TOSHKENT, 18-yanvar. /“Dunyo” AA/. 2025-yilda O‘zbekistonga 11,7 million chet el fuqarosi turistik maqsadlarda tashrif buyurgan, deb xabar bermoqda “Dunyo” AA muxbiri.

Milliy statistika qo‘mitasining dastlabki maʼlumotlariga ko‘ra, bu ko‘rsatkich rekord darajaga yetdi va mamlakatga xalqaro qiziqishning barqaror o‘sishini yaqqol aks ettirdi.

2024-yilga nisbatan sayyohlar oqimi 3,7 million kishiga ko‘payib, 46,8 foizni tashkil etdi. Sezilarli o‘sish turizm infratuzilmasini rivojlantirish, viza rejimini liberallashtirish, xalqaro aviaqatnovlarni kengaytirish va O‘zbekistonning sayyohlik salohiyatini xorijda faol targ‘ib qilish bo‘yicha kompleks chora-tadbirlar bilan taʼminlandi.

2025-yilda O‘zbekistonga tashrif buyurgan sayyohlar soni bo‘yicha Top-10 mamlakat:

Qirg‘iziston - 3,3 million kishi,

Tojikiston - 2,7 million,

Qozog‘iston - 2,7 million,

Rossiya - 984,4 ming,

Afg‘oniston - 476,7 ming;

Turkmaniston - 370 ming,

Xitoy - 278,9 ming;

Turkiya - 174,9 ming,

Hindiston - 80,8 ming;

Koreya Respublikasi - 46,3 ming.

Markaziy Osiyo, MDH, Osiyo va Yaqin Sharq mamlakatlaridan sayyohlar oqimining o‘sishi O‘zbekistonning mintaqadagi asosiy sayyohlik markazlaridan biri sifatidagi roli ortib borayotganidan dalolat beradi.

Erishilgan ko‘rsatkichlar O‘zbekiston boy tarixiy-madaniy meros, zamonaviy infratuzilma va anʼanaviy mehmondo‘stlikni barqaror rivojlanish va xalqaro hamkorlikning kuchli drayveriga aylantirib, jahon sayyohlik xaritasida o‘z o‘rnini ishonchli mustahkamlayotganini tasdiqlaydi.