TOSHKENT, 13-dekabr. / “Dunyo” AA/. Toshkent Xalqaro shaxmat akademiyasida O'zbekiston tashqi ishlar vaziri kubogi uchun tezkor shaxmat turniri bo'lib o'tmoqda, deb xabar qilmoqda “Dunyo” AA muxbiri.

Musobaqalar Tashqi ishlar vazirligi tomonidan O'zbekiston SHaxmat federatsiyasi bilan hamkorlikda, TIV xodimlari, shuningdek, mamlakatimizda akkreditatsiyadan o'tgan xorijiy davlatlarning diplomatik vakolatxonalari va xalqaro tashkilotlar xodimlari ishtirokida o'tkazilmoqda. Turnir norasmiy muloqot, o'zaro tushunishni mustahkamlash va diplomatik korpus vakillari o'rtasida sheriklik aloqalarini rivojlantirish uchun maydon bo'lib xizmat qiladi.

Tadbir shaxmatni intellektual sport turi sifatida ommalashtirishga, sog'lom va faol turmush tarzi madaniyatini shakllantirishga, shuningdek, jamoaviy sport turlarini rivojlantirish bo'yicha tashabbuslarni qo'llab-quvvatlashga qaratilgan.