MAKKA, 6-sentyabr. /"Dunyo" AA/. Saudiya Arabistonining Makka shahrida O'zbekiston mustaqilligining 34 yilligiga bag'ishlangan bayram tadbiri tashkil etildi, deb xabar qilmoqda "Dunyo" AA muxbiri.

O'zbekistondan Umra ziyorati uchun Saudiya Arabistonida borgan vatandoshlarimiz qatnashgan bayram tadbirida O'zbekiston yangi tarixiy davrga qadam qo'ygani, siyosiy, ijtimoiy-iqtisodiy jabhalardagi islohotlar, jumladan, jamiyatimiz va butun mamlakatimiz taraqqiyoti uchun ustuvor ahamiyatga ega bo'lgan umumdavlat dasturlari haqida so'zlab berildi.

So'nggi yillarda barcha sohalar qatori diniy-ma'rifiy yo'nalishda ham ulkan o'zgarishlar ro'y bergani, jumladan, Umra ziyorati uchun kvotalar bir necha yuz ming nafarga, Haj kvotasi esa 15 mingga oshirilgani ma'lum qilindi.

Vatandoshlar o'z chiqishlarida O'zbekiston hukumati tomonidan ziyoratchilar uchun yaratilgan shart-sharoit va qulayliklar uchun minnatdorlik bildirdilar.

Bayram tadbiri so'nggida yoshi ulug' otaxon va onaxonlarimiz jonajon O'zbekistonimiz tinchligi va taraqqiyotini so'rab duolar qildilar.