NAMANGAN, 18-sentabr. /Dunyo" AA/. BMT Taraqqiyot dasturining O'zbekistondagi Doimiy vakili o'rinbosari Anas Fayyad Karman "Dunyo" AA intervyusida Namanganda o'tagan "Kambag'allikdan farovonlik sari" III xalqaro forumining ahamiyati haqidagi fikrlarini bayon qildi.

– Bu xalqaro hamjamiyat uchun juda muhim forum. Prezident Shavkat Mirziyoyev o'z nutqida O'zbekistonning kambag'allikni qisqartirish borasida erishgan ajoyib yutuqlarini qayd etdi. Jahon banki vakillari ham o'z taqdimotlarida jahon ko'rsatkichlari bilan taqqoslaganda mamlakat natijalarini alohida ta'kidladi. O'zbekistonda kambag'allik darajasi jahondagi o'rtacha ko'rsatkichdan deyarli ikki baravar tez qisqarmoqda.

Bugungi kunda bu ko'rsatkich 6,8 foizni tashkil etadi va bu ajoyib yutuq. Kambag'allikka qarshi kurashishning harakatlantiruvchi kuchiga aylanib borayotgan tadbirkorlar va startaplarni qo'llab-quvvatlashga e'tibor qaratgan holda islohotlar jadalligini saqlab qolish muhim. O'zbekiston tajribasi boshqa mamlakatlar uchun namuna bo'lishi kerak. Biroq muammoni ko'p qirrali kambag'allik nuqtai nazaridan ko'rib chiqish muhim, deb o'ylayman. Bu nafaqat aholining daromadi, ta'lim darajasi, odamlarni munosib yashash va muvaffaqiyatga erishishi va boshqa omillarga bevosita ta'sirini ham hisobga olishni anglatadi.

Albatta, bu natijalarga keyingi sakkiz-to'qqiz yil davomida amalga oshirilgan islohotlar tufayli erishildi. Shu vaqt ichida kambag'allik darajasi 6,8 foizga tushirilib, 7,5 millionga yaqin odam kambag'allikdan chiqarildi. Bu tizimli va izchil sa'y-harakatlar samarasidir.