GUANCHJOU, 24 iyun. /"Dunyo" AA/. Xitoyning "Shenzhen Jiashang Yanghe Trading" kompaniyasi Namangan viloyatidan umumiy hajmi 20 tonna bo'lgan gilos mevasini import qilishni boshladi, deb xabar qilmoqda "Dunyo" AA muxbiri.

O'zbek gilosining dastlabki partiyasi aviakargo orqali Guandun provinsiyasining Shenchjen shahriga yetkazib berildi. O'zbekistonda yetishtirilgan gilos mevasi bojxona rasmiylashtiruvidan o'tgandan so'ng yirik chakana va ulgurji savdo tarmoqlari orqali sotuvga chiqarildi.

Mutaxassislarga ko'ra, O'zbekiston gilosi Xitoyda sevib iste'mol qilinadigan mevalardan biri bo'lib, o'zining mazali ta'mi va tabiiy ekologik tozaligi bilan mahalliy iste'molchilar ishonchini qozonmoqda.

Kompaniya kelgusida mamlakatimizdan qishloq xo'jaligi mahsulotlarini sotib olish hajmlari va ularni nomenklaturasini kengaytirish maqsadida o'zbekistonlik hamkorlari bilan muzokaralar olib bormoqda.