TOSHKENT, 12-sentyabr. /"Dunyo" AA/. Braziliya sobiq prezidenti Jair Bolsonaru 27 yillik qamoq jazosiga hukm qilindi, deb xabar beryapti "Dunyo" AA muxbiri.

"BBC" ma'lumotiga ko'ra, Braziliya Oliy sudi Jair Bolsonaruni 2022-yilgi saylovlarda mag'lub bo'lganidan keyin harbiy to'ntarish uyushtirish bo'yicha aybdor deb topganidan so'ng ko'p o'tmay hukm chiqardi.

Sud uni beshta modda, jumladan, jinoiy tashkilotga rahbarlik qilish, demokratik tartibni buzish va 2023-yil yanvarida hukumat binolariga hujum qilishda ishtirok etishda aybdor deb topdi. Hukmni chiqarish uchun hal qiluvchi ovozni sudya Karmen Lyusiya berdi va sobiq prezidentning harakatlari mamlakatning demokratik institutlariga tahdid, deya baholadi.

Jair Bolsonaruning advokatlari hukmni "bema'nilik" deb atashdi va xalqaro sudlarga murojaat qilishlarini bildirishdi. Uy qamog'ida bo'lgan sobiq rahbarning o'zi salomatligi sababli sudda qatnashmadi.

"BBC"saytidan olingan surat