ISLOMOBOD, 25-oktabr. /«Dunyo» AA/. «Umumiy kelajakka jamiyati» tahlil markazi ijrochi direktori Xolid Taymur Akram (Pokiston) «Dunyo» AA uchun intervyusida Oʻzbekiston Prezidenti Shavkat Mirziyoyevning Belgiyaga amalga oshirgan rasmiy tashrifi yakunlari haqidagi fikrlarini bildirdi:

–Ekspert sifatida Oʻzbekiston Prezidenti Shavkat Mirziyoyevning Bryusselga buyurgan rasmiy tashrifini katta qiziqish bilan kuzatdim. Bu tashrif, shubhasiz, nafaqat Toshkent, balki butun Markaziy Osiyo mintaqasi uchun strategik ahamiyatga ega.

Birinchidan, Yevropa Ittifoqi bilan yangilangan Kengaytirilgan sheriklik va hamkorlik toʻgʻrisidagi bitimning imzolanishi Oʻzbekistonning Yevropa bilan iqtisodiy va siyosiy aloqalarini mustahkamlash yoʻlidagi hal qiluvchi qadam boʻladi. Mazkur kelishuv Oʻzbekistonning YEI bilan munosabatlarida yangi sahifani samarali ochib, mamlakatni savdo, sarmoya va boshqaruv sohasida Yevropa standartlariga yaqinlashtiradi.

Ikkinchidan, Jahon savdo tashkilotiga a'zo boʻlish boʻyicha muzokaralarni yakunlovchi qoʻshma bayonotning qabul qilinishi ramziy va amaliy voqeadir. Bu Oʻzbekistonda soʻnggi yillarda amalga oshirilgan islohotlarning izchilligi va tizimliligini oʻzida aks ettiradi. Mintaqa mamlakatlari uchun bu izchil iqtisodiy modernizatsiya va shaffof savdo siyosati jahon iqtisodiyotiga adolatli shartlar asosida integratsiyalashuvga olib kelishiga misol boʻladi.

Qolaversa, Prezident Shavkat Mirziyoyevning Yevropa Kengashi prezidenti Sharl Mishel, Yevropa Komissiyasi prezidenti Ursula fon der Lyayen, Belgiyaliklar Qiroli Filipp bilan uchrashuvlari Oʻzbekiston bilan Yevropa oʻrtasidagi ishonch va siyosiy muloqot yuksak darajada ekanini koʻrsatadi. Yevropa poytaxti Toshkentni Markaziy Osiyoda barqarorlashtiruvchi rol oʻynashga qodir ishonchli hamkor sifatida koʻrmoqda.

Oʻzbekistonning Yevropadagi mavqeini mustahkamlash butun Yevroosiyo uchun ham yangi imkoniyatlar yaratadi. Toshkentning Bryussel kun tartibi faqat Oʻzbekiston haqida emas. Bu mintaqaning global siyosat va iqtisodiyotdagi ahamiyati ortib borayotganidan dalolat beradi. Uzoq muddatli istiqbolda bu Yevropa Ittifoqi va Markaziy Osiyo oʻrtasidagi, xususan, transport va energetika yoʻlaklari kontekstida yaqinroq aloqalarga hissa qoʻshishi mumkin.