DUSHANBE, 3-sentabr. /"Dunyo" AA/. Tojikiston Milliy fanlar akademiyasi Falsafa, siyosatshunoslik va huquq instituti ilmiy xodimi Viktor Kim "Dunyo" AA uchun intervyusida O'zbekiston Prezidenti Shavkat Mirziyoyevning 31-avgust – 1-sentabr kunlari Xitoyning Tyanszin shahrida bo'lib o'tgan Shanxay hamkorlik tashkiloti sammitidagi ishtiroki haqidagi fikrlarini bildirdi:

– 2025-yil sentabr oyining birinchi kunlaridan boshlab Tyanszin shahrida o'tkazilayotgan SHHT sammiti va Ikkinchi jahon urushidagi G'alabaning 80 yilligiga bag'ishlangan tantanalar butun jahon hamjamiyatining diqqat-e'tiborini tortgan yirik va muhim siyosiy voqea bo'lmoqda. Yutuqlar, natijalar, prognozlar haqida ko'p aytiladi. Ammo shu bilan birga, tarixni alohida shaxslar yaratishini tushunish kerak.

Va, eng avvalo, yetakchilardan biri, SHHTga a'zo davlatlar haqida gapirish kerak. O'zbekiston Prezidenti Shavkat Mirziyoyev – islohotchi Prezident, xalq Prezidenti. Uning izchil, mantiqiy o'zaro bog'liq siyosati ichki siyosatda ham, tashqi siyosatda ham ijobiy natijalarga erishish imkonini berdi. Buni uning SHHT Davlat rahbarlari kengashi majlislarida so'zlagan nutqlarida ham ko'rishimiz mumkin.

U Tyanszinda O'zbekistonning muammolarni birgalikda hal etishga qaratilgan va rivojlanish istiqbollarini yaqqol namoyon qilgan tashabbuslarini ilgari surdi.

O'zbekiston yetakchisi, avvalo, SHHTga a'zo davlatlar o'rtasidagi munosabatlarda "Shanxay ruhi" mavjudligini buyuk Konfutsiyning "O'zingni qaror toptirish, boshqalarga yordam berish, muvaffaqiyatga intilish, boshqalarning muvaffaqiyatiga hissa qo'shish" degan hikmatli so'zlari orqali tasdiqladi. Jahondagi xavfsizlik masalalariga to'xtalish, SHHTning yadroviy xavfsizlik yo'lida ko'p tomonlama sheriklikni mustahkamlash deklaratsiyasini qabul qilishni taklif qilgan Shavkat Mirziyoyevga muammolarga global qarash hamisha xosdir.

Jahon iqtisodiyotidagi mavjud tendensiyalar fonida O'zbekiston savdo-iqtisodiy hamkorlikni rivojlantirishga katta ahamiyat bermoqda. O'zbekiston rahbari, avvalo, SHHTning ulkan makonining transport-tranzit salohiyatidan "Shimol-Janub" va "Sharq-G'arb" yo'nalishlarida foydalanish muhimligiga e'tibor qaratadi. Shu bilan birga, u Fors ko'rfazi va Hind okeani portlariga chiqish imkoniyatiga ega Markaziy Osiyo hududi orqali janubiy yo'nalishda yo'laklarni rivojlantirishga alohida urg'u beradi.

Prezident Shavkat Mirziyoyev zamonaviy iqtisodiyotning rivojlanish tendensiyalarini inobatga olgan holda, yana bir muhim ustuvor yo'nalish – SHHTni "yashil" transformatsiyalash sohasidagi sheriklikni kengaytirishga e'tibor qaratdi.

Shanxay hamkorlik tashkilotining Tyanszindagi sammitining muhim yakuni sifatida Toshkentda SHHT MATT negizida doimiy faoliyat yurituvchi organ – a'zo davlatlar xavfsizligiga xavf va tahdidlarga qarshi kurashish bo'yicha universal markazni tashkil etish to'g'risidagi qaror qabul qilindi. Uning qoshida SHHT Axborot xavfsizligi markazi ham tashkil etilmoqda.