XIVA, 26-sentyabr. /"Dunyo"AA/. Xiva shahrida O'zbekiston va Turkmaniston biznes-forumi o'tkazildi, deb xabar qilmoqda "Dunyo" AA muxbiri.

Iqtisodiy tadbirda ikki mamlakat ishbilarmon doiralari vakillari qatnashdi. Biznes-forum chog'ida ikki mamlakat hududlari va ishbilarmon doiralari vakillari o'rtasida eksport-import, investitsiyalar, sanoat kooperatsiyasi, turizm va boshqa sohalarda o'zaro manfaatli hamkorlikni kuchaytirish masalalari muhokama qilindi.

Tomonlar "Shovot-Dashoguz" chegaraoldi savdo zonasining tashkil etilishi ikki mamlakat o'rtasida o'zaro tovar ayirboshlash hajmini oshirish va hududlararo hamkorlikni yana-da faollashtirishga xizmat qilishiga ishonch bildirdi.

 Turkmaniston tomoni uchun O'zbekistonda xorijiy investorlarga yaratilgan qulay shart-sharoitlar va imkoniyatlar, Xorazm viloyatining iqtisodiy salohiyati, xususan, eksport imkoniyatlari va investitsiya loyihalari haqida taqdimot o'tkazildi.

Joriy yil so'nggiga qadar Xorazm viloyati ishbilarmon doiralari vakillarining Dashoguz viloyatiga biznes-missiyasini tashkil qilish to'g'risida kelishuvga erishildi.

Ikki davlat ishbilarmon doiralari vakillari o'rtasida bo'lib o'tgan "B2G" va "B2B" muzokaralar yakunida bir qator eksport shartnomalari va hamkorlik to'g'risidagi memorandumlar imzolandi.