TEL-AVIV, 28-aprel. /"Dunyo" AA/. O'zbekiston-Isroil savdo-investitsiya uyi prezidenti Nargiza Qodirova "Dunyo" AA uchun intervyusida 23-24-aprel kunlari Zomin tumanida bo'lib o'tgan "Jizzax-2025" xalqaro biznes-forum haqidagi fikrlarini bildirdi:

– Biz ushbu formatdagi yirik tadbirda ilk marta ishtirok etdik va u bizga katta tajriba bo'ldi. Biznes-forumga yettita yetakchi isroil kompaniyalari vakillarini olib keldik. Bu esa Isroilda ushbu tadbirga qiziqish yuqori bo'lganini tasdiqlaydi. Umid qilamizki, keyingi forumlarda yana-da ko'proq Isroil kompaniyalari ishtirok etadi va O'zbekiston bilan savdo-iqtisodiy ham investitsiyaviy hamkorlikka qiziqish bildiradi.

Forum doirasida Isroil kompaniyalari ishtirokida turli sohalar bo'yicha yettita istiqbolli eksport shartnomalari imzolandi. Shuningdek, ushbu davlat vakillariga o'zbekistonlik tadbirkorlar bilan to'g'ridan-to'g'ri aloqalar o'rnatish, qishloq xo'jaligi, texnologiyalar va sanoat sohalarida istiqbolli loyihalarni amalga oshirish imkoniyatlarini muhokama qilish uchun maydon yaratildi.