SANA, 12-avgust. /"Dunyo" AA/. Yamanning "Hadarmawt" axborot agentligi saytida "2025-yil I yarim yillikda O'zbekiston iqtisodiyotining rivojlanishi" sarlavhali maqola e'lon qilindi, deb xabar qilmoqda "Dunyo" AA muxbiri.

Unda O'zbekiston Milliy statistika qo'mitasi ma'lumotlariga ko'ra, 2025-yil yanvar–iyun oylarida yalpi ichki mahsulot (YAIM) 807,9 trillion so'mni tashkil etib, o'tgan yilning shu davriga nisbatan 7,2 foizga oshgani qayd etilgan.

"Asosiy tashqi savdo hamkorlari bo'lgan davlatlarda ijobiy tendensiyalar saqlanmoqda. Qozog'istonda YIM 2025-yil yanvar–iyun oylari yakunlari bo'yicha 6,2 foizni tashkil etdi, Qirg'izistonda – 11,7 foiz, Xitoyda – 5,3 foiz, Rossiya Iqtisodiy rivojlanish vazirligi ma'lumotlariga ko'ra, Rossiyada 1,4 foizga yetdi", – deyilgan materialda.

Qayd etilishicha, iste'mol narxlari indeksi 2024-yil dekabr oyiga nisbatan 104,2 foizni tashkil etdi, bu esa narxlar o'sish sur'atlari sekinlashayotganini ko'rsatadi. Oziq-ovqat va nooziq-ovqat tovarlari segmentlarida narxlar o'rtacha darajada o'smoqda, shu bilan birga, xizmatlar inflyatsiyaning asosiy drayveri bo'lib qolmoqda va umumiy iste'mol narxlari darajasiga eng katta ta'sirni ko'rsatmoqda.

"Asosiy kapitalga investitsiyalar hajmi 5,5 foizga oshib, 273,4 trillion so'mga yetdi. O'tgan yil boshidagi yuqori o'sish sur'atlariga nisbatan sekinlashganiga qaramasdan, investitsiya faolligi barqaror qolmoqda. Investitsiya manbalarida markazlashmagan mablag'lar, jumladan korxonalar va aholi mablag'lari, shuningdek, to'g'ridan-to'g'ri xorijiy investitsiyalar ustunlik qilmoqda", – deb yozilgan manbada.

Yaman OAV ma'lum qilganidek, O'zbekistonda ishlab chiqarish sanoati barqaror o'sishni ko'rsatmoqda. Sanoat mahsulotlari ishlab chiqarish hajmi 6,6 foizga (488,5 trillion so'm), qishloq, o'rmon va baliq xo'jaligida 4,0 foizga (194,9 trillion so'm), qurilish ishlari hajmi 10,7%ga (137,6 trillion so'm) o'sdi.

"O'zbekistonning tashqi savdo aylanmasi 37 milliard dollarga yetib, 16,1 foizga oshdi. Eksport 16,9 milliard dollarni (+29,1 foiz) tashkil etdi, import esa 7,0 foizga o'sib, 20,1 milliard dollarga yetdi. Eksportning tezlashishi xizmatlar, xomashyo va energetika resurslari yetkazib berishning ortishi bilan bog'liq", – deb yozgan "Hadarmawt" agentligi.