QOHIRA, 27-oktyabr. /"Dunyo" AA/. Misrning "Sada al-Balad" axborot agentligi "Ta'lim va malaka global imkoniyatlarga yo'l sifatida: O'zbekiston migratsiya siyosatining yangi yo'nalishi" sarlavhali maqolani e'lon qildi, deb xabar bermoqda "Dunyo" AA muxbiri.

"So'nggi yillarda O'zbekistonda inson kapitalini rivojlantirish va mehnat migratsiyasini tizimli, insonparvar boshqarishga qaratilgan keng ko'lamli islohotlar amalga oshirilmoqda, – deyilgan maqolada. – Ushbu o'zgarishlar nafaqat fuqarolarning chet elda qonuniy va xavfsiz ish bilan ta'minlanishini ta'minlashga, balki ularning malakasi, bilimi va ijtimoiy salohiyatini oshirishga ham qaratilgan".

Ma'lum qilinganidek, O'zbekiston Vazirlar Mahkamasi huzuridagi Migratsiya agentligi qayta tashkil etildi. Yangi tuzilma mehnat migratsiyasini sof iqtisodiy jarayon sifatida emas, balki inson taraqqiyoti va ijtimoiy barqarorlikning hal qiluvchi omili sifatida ko'rib chiqadi. Agentlikning asosiy maqsadlari migratsiya jarayonlarini qonuniy, xavfsiz va samarali tashkil etish, shuningdek, fuqarolarga o'qitish, qayta integratsiyalashish va huquqiy himoyani ta'minlashdir.

Qayd etilishicha, mehnat migratsiyasining yangi bosqichi kasbiy tayyorgarlik va malakalarni xalqaro standartlarga moslashtirishni o'z ichiga oladi. Mamlakat bo'ylab faoliyat yurituvchi o'quv markazlarida fuqarolar chet tillari, kasbiy sertifikatlar va mehnat huquqlari bo'yicha o'qitishdan o'tadilar.

"Bu model Finlyandiya ta'lim tizimiga o'xshaydi, bu yerda kasbiy malaka va umrbod ta'lim inson kapitalini rivojlantirish siyosatining asosi hisoblanadi. O'zbekiston shuningdek, o'z ishchi kuchini xalqaro standartlarga muvofiq tayyorlash uchun bunday tajribani qabul qilish va amalga oshirishga intiladi", – deb ta'kidlangan manbada.

O'z navbatida, Finlyandiya bilan hamkorlik, ayniqsa, ta'lim va kasb-hunar ta'limi sohasida katta salohiyatga ega. Bu mamlakatning raqamli iqtisodiyot uchun uzluksiz ta'lim, innovatsiya va ishchi kuchini rivojlantirish sohasidagi tajribasi O'zbekiston uchun muhim ahamiyatga ega.

"Finlyandiya bilan hamkorlik, ta'lim va kasb-hunar ta'limi sohasidagi ilg'or tajribasiga asoslanib, yangi global imkoniyatlarni ochib beradi va ikkala mamlakatda ham inson kapitalining o'sishiga hissa qo'shadi", – deyilgan maqola yakunida.