ISLOMOBOD, 12-noyabr. /"Dunyo" AA/. Pokistonning ommabop "The World News" yangiliklar platformasida "Toshkent 2026-yilda Osiyoning sayohat qilish uchun eng yaxshi manzillari ro'yxatiga kiritildi" sarlavhali maqola e'lon qilindi, deb xabar bermoqda "Dunyo" AA muxbiri.

Unda Toshkent "Condé Nast Traveler" xalqaro sayyohlik jurnali tomonidan "2026-yilda Osiyoda sayohat qilish uchun eng yaxshi joylar" ro'yxatidan joy olgani xabar qilingan.

Jurnal tomonidan e'lon qilingan reytingda qayd etilishicha, shahar o'zining tarixi va zamonaviyligining noyob uyg'unligi bilan sayyohlarni o'ziga jalb qiladi. Bu yerda qadimiy madrasalar va bozorlar yangi madaniy maydonlar bilan yonma-yon joylashgan va sayohatchilar uchun o'ziga xos muhit yaratadi.

"Condé Nast Traveler" nashrining yozishicha, Toshkent Markaziy Osiyoning madaniy turizm markaziga aylanib bormoqda. Yangi "Islom sivilizatsiyasi markazi" majmuasi va "Zamonaviy san'at markazi" galereyasi ochilishi shaharni ham qadimiy an'analar, ham zamonaviy badiiy hayot bilan tanishish imkonini yaratuvchi maskanga aylantiradi.

"Bugungi kunda Toshkent sayyohlarni nafaqat O'zbekistonning go'zal maskanlariga yo'naltiruvchi boshlang'ich nuqta sifatida, balki mustaqil sayyohlik yo'nalishi sifatida ham jalb qilmoqda. Shahar boy madaniy dastur va Markaziy Osiyo poytaxtining o'ziga xos muhitini taqdim etib, yangi taassurotlar va odatiy bo'lmagan sayohatlarni izlaydiganlar uchun albatta borib ko'rish lozim bo'lgan manzilga aylanadi", – deb yozgan "The World News Am".