VLADIVOSTOK, 15-yanvar. /"Dunyo"AA/. O'zbekiston Bosh konsulxonasi vakillari Rossiyaning Primorsk o'lkasida vaqtincha bo'lib turgan va mehnat faoliyatini amalga oshirayotgan vatandoshlar bilan uchrashuv o'tkazdilar, deb xabar qilmoqda "Dunyo" AA muxbiri.

"Pasport-viza xizmati" filialida bo'lib o'tgan uchrashuvda mamlakatimizning 80 nafar fuqarosi ishtirok etdi. Diplomatlar ular bilan Rossiya Prezidentining 2024-yil 20-dekabrdagi "Rossiya Federatsiyasida chet el fuqarolari va fuqaroligi bo'lmagan shaxslarning ayrim toifalarining huquqiy holatini tartibga solish bo'yicha vaqtinchalik chora-tadbirlar to'g'risida"gi Farmonini muhokama qilib, fuqarolarning huquqiy holatini tartibga solish bo'yicha tegishli maslahatlar berdilar.

Vatandoshlar olingan ma'lumot va maslahatlar uchun minnatdorchilik bildirdilar, shuningdek, diplomatlarga targ'ibot-tashviqot ishlarini olib borish orqali Primorsk o'lkasida noqonuniy bo'lib turgan O'zbekiston fuqarolarining huquqiy holatini tartibga solish bo'yicha ishlarni amalga oshirishda yordam berishga tayyor ekanliklarini ta'kidladilar.