ANQARA, 28-avgust. /"Dunyo" AA/. Turkiyaning "Anadolu" axborot agentligi O'zbekiston elchisi Ilhom Haydarov bilan intervyuni e'lon qildi, deb xabar beryapti "Dunyo" AA muxbiri.

Suhbat avvalida O'zbekiston elchisi o'z lavozimiga kirishganidan so'ng Turkiyadagi vazirlar va idoralar rahbarlari, ayniqsa, qo'shma ikki tomonlama loyihalari bor tashkilotlar bilan bevosita aloqalarni yo'lga qo'yishga alohida e'tibor qaratganini ta'kidlagan.

"Turkiyadagi faoliyatim davomida mamlakatning 81 viloyatiga tashrif buyurishga, ularning har birining iqtisodiy salohiyati, tarixi va madaniy xususiyatlarini o'rganishga va O'zbekiston hududlari bilan o'zaro manfaatli savdo aloqalarini o'rnatish uchun barcha choralarni ko'rishga va'da berganman", – degan diplomat.

Elchi Ilhom Haydarov ta'kidlaganidek, so'nggi yillarda ikki davlat o'rtasidagi tovar ayirboshlash hajmi tobora ortib bormoqda.

"Bugungi kunda O'zbekiston va Turkiya o'rtasidagi tovar ayirboshlash hajmi 3 milliard dollardan oshdi. Biroq, bu bizni qoniqtiradimi, degan savolga, "yo'q" deb javob berishimiz kerak. Bu ko'rsatkich mamlakatlarimiz salohiyatini to'liq aks ettirmasligi hammaga ma'lum. Muhtaram Prezidentlarimiz tomonidan belgilab berilgan 5 milliard dollarlik maqsadni amalga oshirish yo'lida bor kuchimizni safarbar qilyapmiz. Faoliyatim davomida bu ko'rsatkichga erishish uchun astoydil harakat qilaman.

O'zbekiston uchun Turkiya bilan savdo-iqtisodiy aloqalar katta ahamiyatga ega. O'tgan yili to'g'ridan-to'g'ri xorijiy sarmoyaning 7 foizi turkiyalik hamkorlarimiz hissasiga to'g'ri keldi. Turk kapitali ishtirokidagi kompaniyalar soni oy sayin ortib bormoqda. Yil boshida 1800 ga yaqin kompaniyalar soni 2006 ga yetdi. Sa'y-harakatlarimiz, rag'batlantirish va rag'batlantirishlarimiz bilan ularning sonini ko'paytiramiz", – deya qayd etgan O'zbekiston elchisi.

Shuningdek, 2018-yildan boshlab O'zbekiston uchun viza tartibi bekor qilingani ijobiy natijalar berayotgani ta'kidlandi. Hozirgi kunda ikki davlat shaharlari o'rtasida haftasiga 90 dan ortiq aviaqatnovlar amalga oshirilmoqda. O'zbekistonga 2023-yilda 106 ming nafar sayyoh tashrif buyurgan bo'lsa, 2024-yilda 150 ming nafardan oshdi. Yil oxirigacha 200 ming sayyoh bo'lish ko'rsatkichiga erishish kutilmoqda.

Elchi Ilhom Haydarov, shuningdek, O'zbekiston va Turkiya o'rtasidagi oliy darajadagi strategik hamkorlik kengashining muhim ahamiyat kasb etishini, bu kengash ikki davlat o'rtasidagi barcha sohalardagi munosabatlarning asosiy maqsad va yo'nalishlarini belgilab berishini alohida urg'ulagan. Uning aytishicha, so'nggi yig'ilish 2024-yil 6-iyun kuni Anqarada bo'lib o'tgan, keyingisi esa O'zbekistonda o'tkazilishi rejalashtirilgan.

Intervyu O'zbekiston rasmiy vakilining, "Biz Turkiya Prezidentining O'zbekistonga har bir tashrifini ming yillik tarix va madaniyatga, tili va dini mushtarak bo'lgan, mamlakatimiz mustaqilligini birinchi bo'lib tan olgan olijanob va qardosh xalq rahbarining tashrifi sifatida yuksak baholaymiz", – degan so'zlari bilan yakunlangan.