OSTONA, 17-aprel. /Dunyo"/. Qozog'istonning "Infozakon" elektron nashrida XX asr o'zbek adabiyotining yetuk vakillaridan biri — Abdulla Qodiriy asarlari va ular asosida yaratilgan filmlarga bag'ishlangan maqola e’lon qilindi, deb xabar bermoqda "Dunyo" AA muxbiri.



Maqola muallifining yozishicha, yozuvchi oddiy odamlarning yashash tarzini namoyish etadigan, hayotiy vaziyatlarga yuksak bilim va madaniyat bilan yondashadigan hamda ulardan qanday qilib chiqib ketish yo'llarini biladigan o'nlab qahramonlarni yaratgan. Qodiriy qahramonlari har bir o'quvchi uchun alohida xotiradir. Yozuvchi o'zi aytmoqchi bo'lgan fikrlarni qahramonlar orqali xalqqa yuksak mahorat bilan yetkazgan.

Ta’kidlanishicha, Abdulla Qodiriy kinoga hurmat bilan munosabatda bo'lgan. Rejissyor, aktyor Yo'ldosh A’zamov va yozuvchi Zinnat Fatxullin yozuvchining zamondosh Nabi G'aniyev Qodiriyning "O'tgan kunlar" romani asosida film suratga olish istagi haqida aytib o'tishgan.

Maqolada o'tgan asrning 20 yillarida Qodiriyning "Ravot shoqollari" asari asosida suratga olingan film haqida ham ma’lumot ta’kidlangan. Moskva yaqinidagi Oq ustunlar shaharchasida joylashgan Davlat film fondi ma’lumotlariga ko'ra, ushbu film 1927-yil 18-mayda tomoshabinlarga taqdim etilgan. Asarning o'zi Qodiriy tomonidan mart oyida yozilgan.

"Qodiriy o'z asarlarida ko'tarilgan muammolar hozirgi kunda ham o'z ahamiyatini yo'qotmagan. Xususan, malakali kadrlarni tarbiyalash, ekrandagi milliy shakllarini izlash, kino arboblari va ularning asarlariga professional, talabchan, ammo ehtiyotkorlik bilan munosabatda bo'lish - bu eng muhim masalalar hali ham birinchi o'rinda turadi. Abdulla Qodiriy kelajakda muammoning kuchayishini oldindan bilganga o'xshaydi", — deb yozadi muallif.

Qayd etilishicha, odamlar Abdulla Qodiriyning nasriy asarlari va publitsistikasiga qayta-qayta murojaat qiladilar.

"Siz uning qahramonlaridan professionallik, jasorat, chidamlilik, hayotga muhabbat saboqlarini olishingiz mumkin va kerak, chunki bu qadriyatlar bugungi kunda o'z ahamiyatini yo'qotmagan", — deya ta’kidlangan maqola xulosasida.