ISLOMOBOD, 30-sentyabr. /"Dunyo" AA/. O'zbekiston Oliy Majlisi Qonunchilik palatasi spikeri Nuriddin Ismoilov boshchiligidagi mamlakatimiz delegatsiya Islomobodga tashrifi davomida Pokiston Milliy Assambleyasi spikeri Sardor Ayoz Sadiq bilan uchrashdi, deb xabar qilmoqda "Dunyo" AA muxbiri.

Muloqot chog'ida ikki tomonlama munosabatlarni rivojlantirish va parlamentlararo hamkorlikni kuchaytirish, terrorizm hamda iqlim o'zgarishiga qarshi kurashish sohasida tajriba almashish, savdo-iqtisodiy va transport yo'nalishlarida qo'shma qadamlarni amalga oshirish masalalari muhokama qilindi.

Uchrashuvda barcha sohalardagi munosabatlarni yangi pog'onaga ko'tarishda parlament imkoniyatlaridan samarali foydalanish muhimligi alohida ta'kidlandi. Parlamentlararo "do'stlik guruhlari" faoliyatini jadallashtirish zarurligi e'tirof etildi.

Spiker Sardor Ayoz Sadiq O'zbekistonda Parlamentlararo ittifoqning 150-sessiyasi yuksak saviyada tashkil etilganini e'tirof etib, O'zbekiston tomonini ushbu muvaffaqiyat bilan tabrikladi.

Milliy Assambleya rahbari Lahor va Islomobod shaharlariga to'g'ridan-to'g'ri reyslar ochilganidan mamnunligini bildirib, aviaqatnovlar geografiyasi yana-da kengayishiga umid bildirdi. Shu bilan birga, u O'zbekistonning dunyo dengizlariga chiqish imkoniyatini ta'minlash maqsadida Pokiston portlari – Karachi, Qosim va Gvadardan foydalanish uchun barcha shart-sharoitlar yaratilishini tasdiqladi.

Suhbatda iqlim o'zgarishi masalasiga alohida e'tibor qaratilib, ushbu yo'nalishda O'zbekiston bilan o'zaro hamkorlikni chuqurlashtirishning zarurligi qayd etildi.

Shuningdek, xalqaro tuzilmalar, jumladan Iqtisodiy hamkorlik tashkiloti Parlament Assambleyasi doirasidaga hamkorlikning chuqurlashtirish mexanizmlari bo'yicha fikr almashildi. Shuningdek, mintaqaviy xavfsizlik va barqaror taraqqiyotni ta'minlashda parlamentlarning imkoniyatlaridan samarali foydalanishning muhimligiga urg'u berildi.

Muzokaralar yakunida Nuriddin Ismoilov pokistonlik hamkasbiga tashrif bilan O'zbekistonga borish taklifini bildirdi.

O'zbekiston delegatsiyasi Pokiston Milliy Assambleyasi tavsiyasiga ko'ra Ofatlarni boshqarish milliy markazi faoliyati bilan ham tanishdi. U yerda sohaviy hamkorlik masalalari, jumladan o'zaro tajriba almashish va texnik yordam ko'rsatish imkoniyatlari muhokama qilindi.