TOSHKENT, 16-iyun. /"Dunyo" AA/. O'zbekiston Prezidenti Shavkat Mirziyoyev Qozog'iston Prezidenti Qasim-Jomart Toqayevning taklifiga binoan "Markaziy Osiyo – Xitoy" formatidagi ikkinchi sammitda ishtirok etish uchun 17-iyun kuni amaliy tashrif bilan Ostona shahrida bo'ladi, deb xabar qilmoqda "Dunyo" AA muxbiri.

Mamlakatimiz yetakchisi matbuot xizmati ma'lumotiga ko'ra, tadbirda mintaqa davlatlari rahbarlari va Xitoy Xalq Respublikasi Raisi Si Szinpin ishtirok etadi. Siyosiy, savdo-iqtisodiy va madaniy-gumanitar sohalardagi ko'p tomonlama hamkorlikni yana-da rivojlantirish masalalari ko'rib chiqiladi, mintaqaviy va xalqaro ahamiyatga molik dolzarb masalalar yuzasidan fikr almashiladi. Yakunda qo'shma hujjatlar qabul qilinishi ko'zda tutilgan.

Sammit doirasida O'zbekiston Prezidenti Xitoy Raisi bilan ikki tomonlama uchrashuv ham o'tkazadi.

Ta'kidlash joizki, bu formatdagi birinchi sammit Markaziy Osiyo davlatlari va Xitoy o'rtasidagi sheriklik munosabatlarini mustahkamlash va amaliy hamkorlikni kengaytirish maqsadida 2023-yil may oyida Xitoyning Sian shahrida bo'lib o'tgan edi.