TOSHKENT, 28-oktyabr. /"Dunyo" AA/.  O'zbekiston Prezidenti Shavkat Mirziyoyev Qozog'iston Prezidenti Qasim-Jomart Toqayevga Qarag'andi viloyatidagi Kostenko nomidagi konda ro'y bergan portlash oqibatida insonlar halok bo'lgani va jarohat olgani munosabati bilan hamdardlik yo'lladi, deb xabar bermoqda "Dunyo" AA muxbiri.



Bu haqda davlatimiz rahbarining matbuot kotibi Sherzod Asadov o'zining telegram-kanalida yozdi.

"Davlatimiz rahbari konda qolgan konchilar tezroq qutqarilishiga umid bildirdi", — deyiladi xabarda.

«Kazinform" axborot agentligining xabar berishicha, portlash 28 oktyabr kuni soat 2.33 da (Toshkentda — 1.33) Qarag'andi viloyatidagi "ArselorMittal Temirtau" kompaniyasiga tegishli Kostenko konida sodir bo'lgan. Voqea sodir bo'lgan paytda konda 252 kishi bo'lgan, ulardan 205 yer yuzasiga chiqarilgan. 33 kishining vafot etgani ma'lum. Boshqalar hali topilmadi, 20 kishi kasalxonaga yotqizilgan.

Qozog'iston Bosh prokuraturasi kondagi hodisa yuzasidan jinoiy ish qo'zg'atgan.

 "Kazinform" xalqaro axborot agentligi surati