YEKATERINBURG, 8-iyun. /"Dunyo" AA/. Muqaddas Qurbon hayiti arafasida Rossiyaning Yekaterinburg shahrida tahsil olayotgan hamyurtlarimiz uchun xayriya tadbiri tashkil etildi, deb xabar qilmoqda "Dunyo" AA muxbiri.

Mazkur loyiha O'zbekiston Bosh konsulxonasi tashabbusi bilan Yekaterinburg shahrida tadbirkorlik faoliyati bilan shug'ullanib kelayotgan faol vatandoshlarimiz ko'magida uyushtirildi.

Tadbir doirasida Ural davlat tibbiyot universiteti yotoqxonalarida istiqomat qilayotgan 140 nafar vatandosh talabalarga oziq-ovqat mahsulotlari tarqatildi.

Talabalar bilan o'tkazilgan ochiq muloqot chog'ida esa yosh vatandoshlarimizning ta'lim jarayoni, yashash sharoitlari, kundalik hayotda yuzaga kelayotgan muammolar xususida fikr almashildi. Shuningdek, talabalar o'zlarini qiziqtirgan savollarga diplomatlardan batafsil javob oldilar.