MANAMA, 30-avgust. /"Dunyo" AA/. Mamlakatimiz elchixonasi (qarorgohi Ar-Riyoz shahrida joylashgan) ko'magida Bahrayn poytaxti Manama shahrida mushkul ahvolda qolgan S.A. O'zbekistonga qaytarildi, deb xabar qilmoqda "Dunyo" AA muxbiri.

Diplomatik vakolatxonamizdan olingan ma'lumotga ko'ra, S.A. O'zbekistondan 2015-yilda chiqib ketgan va Bahrayn fuqarosiga turmushga chiqqan. Oilaviy mojarolar sababli hamyurtimiz O'zbekistonga qaytarishda yordam so'rab elchixonaga murojaat qilgan.

Murojaat o'rganilganidan keyin hamyurtimizga Vatanga qaytish guvohnomasi rasmiylashtirildi. Shuningdek, mamlakatimizga qaytishi uchun Bahraynda istiqomat qilib kelayotgan faol vatandoshlar ko'magida aviachipta olib berildi. Yurtdoshimiz 28-avgust kuni O'zbekistonga kuzatib qo'yildi.