ATIRAU, 23-iyun. /"Dunyo" AA/. O'zbekistonning Oqtov shahridagi Bosh konsulxonasi tomonidan Qozog'istonning Atirau shahridagi vatandoshlar uchun sayyor konsullik qabul o'tkazildi, deb xabar qilmoqda "Dunyo" AA muxbiri.

Qabul davomida ushbu hududda vaqtincha va doimiy yashayotgan hamda ishlayotgan o'ttizdan ziyod O'zbekiston fuqarolariga tegishli tartibda maslahatlar, huquqiy yordam va konsullik xizmatlari ko'rsatildi.

Qabulga kelgan yurtdoshlarimizga O'zbekistonda kechayotgan yangilanishlar, xorijdagi vatandoshlarni qo'llab-quvvatlash va ular ham aloqalarni mustahkamlashga qaratilgan dasturlar haqida so'zlab berildi. Shuningdek, ularga Qozog'istonning migratsiyaga oid qonunchiligiga rioya qilish lozimligi ta'kidlandi.

O'zbekiston Bosh konsulxonasi xodimlari sayyor qabul davomida Atirau viloyati politsiya boshqarmasi mutasaddilari bilan ham muloqot qildilar. Uchrashuvda Atirau shahridagi O'zbekiston fuqarolari uchun sayyor konsullik qabullarini doimiy ravishda o'tkazishga kelishib olindi.