QOZON, 5-sentabr. /"Dunyo" AA/. Mamlakatimiz Bosh konsulxonasi ko'magida Qozon shahrida og'ir kasallikka chalingan hamyurtimiz Vatanga qaytarildi, deb xabar qilmoqda "Dunyo" AA muxbiri.

1981-yilda tug'ilgan hamyurtimiz A.B. ish vaqtida sog'lig'ida kuzatilgan muammolar tufayli Tatariston shifoxonasiga yotqizilgan.

O'zbekistonning Qozon shahridagi Bosh konsulxonasi Migratsiya agentligi bilan birgalikda vatandoshimizni yurtimizga qaytarish bo'yicha tadbirlarni amalga oshirdi.

A.B. diplomatlar va Migratsiya agentligi xodimlari ko'magida "Uzbekistan Airways" AJning "Qozon-Toshkent" aviayo'nalishidagi samolyotida O'zbekistonga kuzatib qo'yildi.

Hamyurtimiz bugun sog'-salomat O'zbekistonga yetib oldi va davolanishni davom ettirmoqda.