TOSHKENT, 25-sentyabr. /"Dunyo" AA/. "El-yurt umidi" jamg'armasi ijrochi direktori Gulnoza Ismailova Nyu-York shahriga amaliy safari davomida Stenford universiteti qoshidagi "Silk Road" innovatsion birlashmasi ijrochi direktori va hammuassisi Asset Abdualiyev bilan uchrashdi, deb xabar qilmoqda "Dunyo" AA muxbiri.

Jamg'arma ma'lumotiga ko'ra, muzokaralar davomida o'zbekistonlik yosh startapchilar va raqamli texnologiyalar bo'yicha mutaxassislarning Stenford universitetining ta'lim va tadqiqot tashabbuslarida ishtirokini kengaytirish, mamlakatimiz yoshlari tomonidan IT sohasida amalga oshirilayotgan loyihalarni jahon miqyosida ilgari surish istiqbollari muhokama qilindi.

 Raqamlashtirish va axborot texnologiyalari sohasida faoliyat yuritayotgan O'zbekiston yosh davlat xizmatchilari uchun "Silikon" vodiysining yetakchi kompaniyalarida stajirovka o'tash imkoniyatini yaratishga e'tibor qaratildi.

Uchrashuv yakunida sheriklikni yana-da chuqurlashtirish uchun asos bo'ladigan o'zaro anglashuv memorandumi imzolandi.

Bunday hamkorlik O'zbekistonda IT va raqamli texnologiyalar sohasida yuqori malakali kadrlarni tayyorlash, G'arb tajribasini joriy etish va o'zbekistonlik mutaxassislarning "Silikon" vodiysidagi ishtirokini kengaytirishga xizmat qilishi kutilmoqda.

"Silk Road" – bu "Silikon" vodiysida joylashgan, startaplarni qo'llab-quvvatlash va moliyalashtirishga ixtisoslashgan, shuningdek, ularni AQSH hududida amalga oshirish mexanizmlarini ishlab chiqishga ko'maklashadigan tashkilotdir.