GULISTON, 6-sentyabr. /"Dunyo" AA/. Rossiyaning Tomsk viloyati gubernatorining agrosanoat siyosati va tabiatdan foydalanish masalalari bo'yicha o'rinbosari Mixail Ratner boshchiligidagi delegatsiyasi 28-29-avgust kunlari Guliston shahrida bo'lib o'tgan Xalqaro investitsiya forumida ishtirok etdi, deb xabar qilmoqda "Dunyo" AA muxbiri.

Delegatsiya tarkibidan Tomsk biznesining oziq-ovqat sanoati, o'rmon xo'jaligi kompleksi suvni tozalash bo'yicha zamonaviy yechimlarni taklif qiladigan korxonalar rahbarlari o'rin oldi.

– Tomsk viloyati uchun O'zbekiston tashqi iqtisodiy maydondagi asosiy o'yinchilardan biridir, – dedi gubernator o'rinbosari Mixail Ratner. – Biz ko'plab sohalarda hamkorlik qilayapti. O'tgan yil natijalariga ko'ra, respublika mintaqamizning ikkinchi savdo-iqtisodiy hamkori bo'ldi. Tomsk eksportining asosini yog'och va yog'och mahsulotlari tashkil etadi. Asosiy import tovarlari oziq-ovqat mahsulotlaridir.

Tashrif doirasida Tomsk viloyati delegatsiyasi hududdagi Erkin iqtisodiy zonaga tashrif buyurdi. Kulolchilik va charm buyumlardan tortib, jelatin, oqsil va hatto atirgullargacha bo'lgan keng turdagi mahsulotlarni ishlab chiqaruvchi "Peng Sheng" klasterining ishlab chiqarish maydonlari ko'zdan kechirildi. Delegatsiya a'zolari "Sulton" fermer xo'jaligida ham bo'ldi.

Tomsk viloyati oziq-ovqat ishlab chiqarish uchun xomashyo, xususan, mahsulotlarni chuqur qayta ishlash bo'yicha o'z tajribasi bilan o'rtoqlashishga tayyor ekani ta'kidlandi. Sibir qishloq xo'jaligi ilmiy-tadqiqot instituti keng xalqaro aloqalarga va qishloq xo'jaligi ekinlari seleksiyasi va yangi texnologiyalarni ishlab chiqish sohasidagi yutuqlarga ega. Tomsk viloyati O'zbekistonga Sibirdagi eng yirik meva va rezavor mevali pitomnik "Bakcharskoye" OAJdan rezavor ekinlar ko'chatlarini ham yetkazib berishi mumkin.

Shuningdek, chorvachilik sohasida hamkorlik yo'nalishlari va o'zbekistonlik sheriklar bilan hamkorlikning boshqa imkoniyatlari, xususan, elektronika va uchuvchisiz texnologiyalarning mintaqaviy sanoat klasterini shakllantirish masalalari muhokama qilindi.

Tomsk viloyati delegatsiyasining mazkur forumda ishtirok etishi Rossiyaning ushbu viloyati gubernatori Vladimir Mazurning 2024-yil noyabr oyida O'zbekistonga qilgan tashrifi, Sirdaryo va Tomsk viloyatlari o'rtasidagi ko'p qirrali aloqalar tobora kuchayib borayotganining yaqqol davomi bo'ldi.