OLMAOTA, 20-sentyabr. /"Dunyo" AA/. O'zbekiston Bosh konsulxonasi xodimlari Olmaota shahridagi "RAMS Qazaqstan" qurilish kompaniyasida vaqtincha ishlayotgan vatandoshlarimiz bilan uchrashuv o'tkazdilar, deb xabar qilmoqda "Dunyo" AA muxbiri.

Vatandoshlarga O'zbekistonda mehnat migratsiyasi sohasida tartibga solish bo'yicha amalga oshirilayotgan ishlar va yaratilgan shart-sharoitlar, xorijdan o'z Vataniga qaytgan vatandoshlar bandligini ta'minlash bo'yicha dasturlar to'g'risida so'zlab berildi. Shuningdek, mehnat migrantlari va ularning oilalariga davlat tomonidan berilayotgan imtiyozlar haqida to'xtalib o'tildi.

Qozog'istonning migratsiya qonunchiligiga qat'iy rioya qilish, noqonuniy tashkilotlar va tadbirlarga ishtirok etmaslik yuzasidan tegishli tavsiyalar bildirildi.

Muloqot chog'ida yurtdoshlarimizning konsullik-huquqiy sohaga oid savollariga batafsil javob berildi.