QOHIRA, 25-sentyabr. /"Dunyo" AA/. O'zbekistonning Misrdagi elchixonasi diplomatlari Liviyada vaqtincha ishlayotgan hamyurtlarimiz bilan onlayn uchrashuv o'tkazdilar, deb xabar qilmoqda "Dunyo" AA muxbiri.

Unda Liviyada qurilish sohasida ishlayotgan 100 dan ortiq hamyurtlarimiz qatnashdi.

O'zbekiston diplomatlari vatandoshlarga mezbon mamlakatning migratsiyaga oid qonunlariga rioya qilish muhimligini ta'kidladilar. Zarur hollarda elchixonaga murojaat qilish tartibi, tezkor huquqiy maslahat olish va moddiy yordam olish mexanizmlari haqida aytib o'tildi.

Ish beruvchi "Beoblocks Beogard" kompaniyasi rahbariyati bilan kechgan suhbatda vatandoshlarimizning Liviyada qonuniy bo'lishini ta'minlash va ularga munosib sharoitlarni yaratish xususida fikr almashildi.