OQTOV, 24-noyabr. /"Dunyo" AA/. Mamlakatimizning Oqtovdagi Bosh konsulxonasi va Qozog'istondagi elchixonasi hamkorligida Aktobe shahrida O'zbekistonning sayyohlik salohiyatiga bag'ishlangan tadbir tashkil etildi, deb xabar bermoqda "Dunyo" AA muxbiri.

Unda O'zbekistonning sayyohlik salohiyatini har tomonlama ilgari surish, o'zaro sayyohlik almashinuvini ko'paytirish, shuningdek, mintaqa hamkorlari bilan aloqalarni yangi bosqichga olib chiqishga qaratilgan tashabbuslar amalga oshirildi.

Taqdimotda Qozog'iston sayyohlik kompaniyalari, mehmonxona sektori, ishbilarmon doiralari va mahalliy hokimiyat organlarining 40 dan ortiq vakillari ishtirok etdi.

Yig'ilganlarga dastlab O'zbekistonda tibbiy turizmni rivojlantirish istiqbollari va imkoniyatlari to'g'risida batafsil ma'lumot berildi. Shuningdek, tadbirda ishtirok etish uchun O'zbekiston sanatoriy-kurort va tibbiyot muassasalari vakillari "ZOOM" platformasi orqali jalb qilindi, bu esa to'g'ridan-to'g'ri onlayn muloqot va dolzarb maslahatlar olish imkoniyatini yaratdi.

Bundan tashqari, taqdimotda O'zbekiston Turizm qo'mitasi, "Silk Road" xalqaro turizm va madaniy meros universiteti vakili, shuningdek, "Akfamedlayf" kompaniyasi, O'zbekiston Tashqi ishlar vazirligining Diplomatik servis xizmati va qator sayyohlik tashkilotlari ishtirok etdi.

Tadbir davomida O'zbekistonda gastronomik turizmning jadal rivojlanishi va uning xalqaro miqyosda tobora kengayib borayotganini aks ettiruvchi videomateriallar va taqdimotlar namoyish etildi.

G'arbiy Qozog'iston va O'zbekiston o'rtasida sayyohlar oqimini yanada oshirishga xizmat qiladigan aviaqatnovni, xususan, "Oqtov - Nukus - Toshkent" va "Toshkent - Atirau" yo'nalishlarini kengaytirish masalalariga alohida e'tibor qaratildi.

Qozog'iston tomoni "Visit Aktobe" loyihasi vakillari orqali mintaqaning turistik salohiyatini, jumladan, tabiiy, tarixiy va etnomadaniy yo'nalishlarni taqdim etdi.

Uchrashuv yakunida tomonlar hamkorlikni yanada kengaytirish, qo'shma turizm loyihalari va tashabbuslarini amalga oshirishdan manfaatdor ekanini tasdiqladilar.