BERLIN, 26-iyun. /"Dunyo" AA/. Yurtimiz elchixonasi tashabbusi bilan "BGS Falcke" tashkiloti bilan hamkorlikda Berlin federal o'lkasining Fridrixsxayn-Kroysberg tumani madaniyat uyida O'zbekiston madaniyati va turizm salohiyatiga bag'ishlangan taqdimot tadbiri o'tkazildi, deb xabar qilmoqda "Dunyo" AA muxbiri.

Unda Berlin shahri jamoatchilik vakillari va faol vatandoshlar ishtirok etdi. Tadbir davomida mamlakatimizdan kelgan Hafiza Qo'chqorova boshchiligidagi ijodiy guruh o'zining dasturini taqdim etdi.

O'zbekiston diplomatlari ishtirokchilarga mamlakatimizda amalga oshirilayotgan barcha sohalardagi keng qamrovli islohotlar va ularning natijalari haqida ma'lumot berdilar. Ushbu tadbir birodarlashgan Berlin va Toshkent shaharlari o'rtasidagi hamkorlikni yanada kengaytirish, do'stlik aloqalarini mustahkamlashga hissa qo'shishi ta'kidlandi.

"Yangi O'zbekistonni bilasizmi?", "O'zbekistonning sayyohlik imkoniyatlari va o'ziga xosliklari" mavzularida o'tkazilgan taqdimotlar orqali ishtirokchilar mamlakatimiz tarixi, boy madaniyati va san'ati, dunyo tamadduniga beqiyos hissa qo'shgan buyuk ajdodlarimiz haqida qiziqarli ma'lumotlar bilan tanishdilar. Shuningdek, mamlakatimiz turizm salohiyati haqidagi film namoyish etildi.

Tarjimon va yozuvchi Hafiza Qo'chqorova o'zining ijodidan namunalar o'qib berdi.

Bundan tashqari, o'zbek oshxonasining asosiy taomi – palov tayyorlandi va bu yurtimiz gastronomik turizmini tanishtirish imkoniyatini berdi.

"Madaniyat uyimizda ilk marotaba o'tkazilgan O'zbekiston kechasi barchaga juda manzur bo'ldi. Bu kabi tadbirlar xalqlarimizni yanada birlashtiradi, muloqot ko'prigi o'rnatadi. Biz albatta, kelajakda tumanlar orasida ham birodarlashgan hamkorlik aloqalarini yo'lga qo'yishni istaymiz", – dedi Fridrixsxayn-Kroysberg tumani madaniyat uyi rahbari Shtefan Blok.