BUXAREST 29-oktyabr. /"Dunyo" AA/. O'zbekiston elchisi (qarorgohi Varshava shahrida joylashgan) Amirsaid Agzamxodjayev Ruminiya Vazirlar Mahkamasi huzuridagi Investitsiya va tashqi savdo agentligi vitse-prezidenti Doru-Klaudian Frunzulitsa bilan muzokara o'tkazdi, deb xabar qilmoqda "Dunyo" AA muxbiri.

Muzokaralar davomida avtomobilsozlik, qishloq xo'jaligi, veterinariya, elektrotexnika, farmatsevtika, to'qimachilik, kimyo sanoati, IT xizmatlari va transport-logistika sohalarida qo'shma investitsiya loyihalarini amalga oshirish masalalari muhokama qilindi.

Ikki davlat o'rtasidagi savdo-iqtisodiy va investitsiyaviy hamkorlikni yana-da kengaytirish hamda hukumatlararo iqtisodiy kengash faoliyatini tiklash va uning navbatdagi yig'ilishini o'tkazishga alohida e'tibor qaratildi.

Shuningdek, tomonlar Sharqiy va Markaziy Osiyodan Yevropaga multimodal yuk tashishda "O'rta yo'lak"ning ajralmas qismi bo'lgan Ruminiyaning Konstanta porti imkoniyatlaridan foydalanish yuzasidan fikr almashdilar.