MASKAT, 14-avgust. /"Dunyo" AA/. O'zbekiston elchisi Abdusalom Xatamov O'mon Tashqi ishlar vazirligi Diplomatik akademiyasi rahbari Xumeyd al-Maaniy bilan uchrashdi, deb xabar qilmoqda "Dunyo" AA muxbiri.

O'mon Tashqi ishlar vazirligi Diplomatik akademiyasi rahbari Xumeyd al-Maaniy muloqot avvalida joriy yilning aprel oyida Toshkentda malaka oshirgan o'monlik yosh diplomatlar nomidan O'zbekiston Tashqi ishlar vazirligi rahbariyatiga hamda Jahon iqtisodiyoti va diplomatiya universiteti huzuridagi Diplomatik akademiya professor-o'qituvchilariga yuqori darajada tashkil etilgan kurslar uchun minnatdorlik bildirdi.

Muloqot chog'ida, O'monda o'zbekistonlik yosh diplomatlar uchun diplomatik kurslarni tashkil etish imkoniyatlari muhokama qilindi.

Tomonlar mazkur kurslarni 2026-yilning birinchi choragida o'tkazish va tashkiliy ishlar bilan bog'liq masalalarni muhokama qilish maqsadida O'zbekiston va O'mon Diplomatik akademiyalari rahbarlari o'rtasida onlayn uchrashuv o'tkazishga kelishib oldilar.