TOKIO, 19-oktyabr. /"Dunyo" AA/. O'zbekiston elchisi Muxsinxo'ja Abdurahmonov Yaponiya parlamentining Vakillar palatasi deputati, parlamentning O'zbekiston bilan do'stlik ligasi ijro qo'mitasi raisi o'rinbosari Xajime Sasaki bilan uchrashdi, deb xabar qilmoqda "Dunyo" AA muxbiri.

Tomonlar O'zbekiston va Yaponiya parlamentlararo hamkorlikni jadallashtirish istiqbollari xususida fikr almashdilar.

O'zbekiston Prezidentining 2019-yil dekabr oyida Yaponiyaga amalga oshirgan tarixiy tashrifi ikki tomonlama aloqalarni yangi bosqichga ko'tarib, o'zaro savdo-iqtisodiy, investitsiyaviy, ta'lim va turizm kabi sohalarni rivojlantirishga juda katta hissa qo'shgani qayd etildi.

Xajime Sasaki O'zbekiston va Yaponiyani uzoq yillik tarix, o'zaro do'stona va ishonchga asoslangan aloqalar bog'lab turishini ta'kidladi.

U, shuningdek, Yaponiya parlamentining O'zbekiston bilan do'stlik ligasi a'zolari bilan birgalikda ikki tomonlama aloqalarni yanada rivojlantirish uchun o'z hissasini qo'shishga tayyorligi bildirildi.