TOSHKENT, 19-avgust. /"Dunyo" AA/. O'zbekiston elchisi Baxtiyor Ibragimov Qozog'iston sanoat va qurilish vaziri Yersain Nagaspayev bilan uchrashdi, deb xabar qilmoqda "Dunyo" AA muxbiri.

Suhbat chog'ida O'zbekiston Prezidentining 2024-yil avgust oyida Ostonaga amalga oshirgan tashrifi yakunlari bo'yicha imzolangan "yo'l xaritasi"da nazarda tutilgan bir qator loyihalarning amalga oshirilishi va ularni ijrosini yanada jadallashtirish istiqbollari muhokama qilindi.

2030-yilga qadar o'zaro tovar aylanmasini 10 milliard dollarga yetkazish va bu yo'nalishdagi texnik to'siqlarni bosqichma-bosqich bartaraf etish masalalariga alohida e'tibor qaratildi.

Tomonlar to'qimachilik sohasidagi hamkorlikni kengaytirish, mavjud quvvatlarni modernizatsiya qilish va ilg'or standartlarni joriy etish, shuningdek, qishloq xo'jaligi xomashyosini qayta ishlash hamda tayyor sanoat mahsulotlari eksportini oshirish yo'llarini ko'rib chiqdilar.

Shuningdek, muloqot davomida, investitsiyaviy loyihalarni qo'llab-quvvatlash, mustaqil baholash va ilg'or korporativ boshqaruv mezonlarini tatbiq etish orqali xarid-transformatsiya jarayonlarini ochiq va samarali tashkil etish zarurligi ta'kidlandi.

Energetika uskunalari va hisoblash tizimlari ishlab chiqarishga doir tashabbuslar ham ko'rib chiqilib, loyihalarning me'yoriy-huquqiy asoslarini takomillashtirishga kelishib olindi.

Bundan tashqari, uchrashuvda "O'zbekiston texnologik metallar kombinati" AJ va Toshkent viloyati delegatsiyasining 26-27-sentabrda bo'lib o'tadigan "Altay invest–2025" forumida ishtirokini ishlab chiqish taklifi qo'llab-quvvatlandi.