САМАРҚАНД, 25 июнь. /"Дунё" АА/.  Хитойнинг Шинжон-Уйғур автоном райони рақамли ривожланиш департаменти директори Чаншу Ли "Дунё" АА учун интервьюсида Самарқанд шаҳрида бўлиб ўтаётган БМТ Давлат хизматлари форумининг аҳамияти ҳақидаги фикрларини баён қилди:

– Кеча кечқурун етиб келдим, очиғи, Ўзбекистоннинг бугунги тараққиёти ҳақида ҳали тўлиқ ва батафсил тушунчага эга эмасман. Ваҳоланки, ҳозирги босқичда ҳам мен мамлакатда ривожланишга аниқ интилиш борлигини аниқ ҳис қиляпман. Бу Урумчи шаҳрида бўлиб ўтган халқаро анжуманларда яққол намоён бўлди, унда Ўзбекистон расмий вакиллари ҳамкорлик ва инновацияларга жиддий очиқлик намойиш этдилар.

Аввало, Самарқандда "ақлли шаҳар" яратиш бўйича ишлар аллақачон бошланганини ва бу жуда муҳим қадам эканлигини таъкидламоқчиман. Ўз навбатида, Шинжонда биз ушбу лойиҳа бўйича амалий ҳамкорликка тайёргарликни бошлаб юбордик. Раисимизнинг Самарқандга сўнгги ташрифи чоғида рақамли технологиялар соҳасида ҳамкорликни ривожлантириш юзасидан конструктив музокаралар бўлиб ўтган эди.

Дарҳақиқат, рақамли ҳукумат, рақамли иқтисодиёт, интеллектуал логистика ва маълумотларни бошқариш каби соҳаларда бизда кенг истиқболлар мавжуд. Биз нафақат тажриба алмашиш, балки қўшма рақамли инфратузилмани барпо этиш учун саъй-ҳаракатлар, билим, технология ва сармояни бирлаштира оламиз.

Қолаверса, Ўзбекистон ва Шинжон ўртасида маданий жиҳатдан кўплаб умумийлик мавжуд. Бу маънавий-тарихий ришталар бизга рақамли маданиятни шакллантириш учун қўшимча платформа – келажакдаги ҳамкорлик, айниқса, таълим, креатив иқтисодиёт ва маданиятлараро мулоқот учун асос бўлиши мумкин.

Кейинги муҳим босқич, менимча, маълумотлар соҳасига ишончни мустаҳкамлаш, рақамли логистикани ривожлантириш, платформаларни бирлаштириш ва рақамли ечимларни ўзаро тан олиш бўлиши керак. Бу шаффоф ва хавфсиз асосда ягона стандартлар, қўшма тадқиқот марказлари ва маълумотлар алмашинуви тизимларини яратишни талаб қилади.

Шунингдек, бизда инвестицияларни жалб қилиш ва рақамли қишлоқ хўжалигидан тортиб трансчегаравий электрон тижоратгача бўлган кенг қамровли ва кўп тармоқли ҳамкорликни шакллантириш учун ажойиб истиқболлар мавжуд.

Шинжон ва Ўзбекистон ўртасидаги рақамли алоқаларнинг ривожланиши нафақат иқтисодий ўсишга хизмат қилади, балки умумий барқарорлик, фаровонлик ва халқларимиз ўртасидаги дўстликни мустаҳкамлашга хизмат қилишига ишонаман.