ФАРҒОНА, 16 октябрь /"Дунё" АА/. Европада хавфсизлик ва ҳамкорлик ташкилоти (ЕХҲТ) Низоларнинг олдини олиш маркази директори Кейт Фирон "Дунё" АА учун интервьюсида 15-16 октябрь кунлари бўлиб ўтаётган "Фарғона водийси: тинчлик ва тараққиёт йўлида бирдамлик" мавзусидаги Фарғона тинчлик форумининг биринчи йиғилиши ҳақидаги фикрини билдирди:- Ушбу тадбирда қатнашиш Ўзбекистонга яна келганимдан жуда мамнунман ва ЕХҲТ Фарғона тинчлик форумига ўз ҳиссасини қўшганидан фахрланаман.

Сиз ўтмиш билан солиштирганда нима ўзгарганини сўрадингиз. Мен иккита асосий омилни таъкидлаган бўлардим.

Биринчиси, сиёсий ирода. Биз уч давлат Президентлари саъй-ҳаракати минқадаги вазият қандай янги босқичга кўтарилгани ва давлатлар ўртасида ҳам, мамлакатлар ичида ҳам яхши қўшничилик ва ишончни мустаҳкамлашга асосланган аниқ қарашларни шакллантирганини кўриб турибмиз.

Иккинчи омил одамлар. Бу нафақат сиёсий раҳбарлар, балки оддий фуқаролар ҳақида ҳам. Одамлар ўзгаришларни қабул қилишга, бир-бирига ишонишга ва узоқ вақтдан бери излаган нарсаларини амалга оширишга тайёр эдилар: чегараларни эркин кесиб ўтиш, қўшнилар билан савдо-сотиқни ривожлантириш ва ишончга асосланган муносабатларни ўрнатиш.

Форум жуда юқори савияда ўтмоқда. Ҳатто биринчи сессия ҳам муҳим иштирокни кўрсатди. Ўзбекистон, Тожикистон ва Қирғизистондан юқори даражадаги вакиллар қатнашяпти. Бу мисли кўрилмаган ва шунинг учун тарихий аҳамиятга эга. Форум жорий йил бошида, жумладан, Хўжандда эришилган ғоя ва келишувларга асосланади ва уч мамлакат Президентларининг сиёсий қарашларини акс эттиради.

Биз ушбу форумни кенгроқ жараённинг бир қисми деб биламиз. Бу ерда фуқаролик жамияти ва халқаро ташкилотлар – БМТ, Европа Иттифоқи, ЕХҲТ ва бошқа ташкилотлар вакиллари билан ҳамкорликда ишлаётганимиздан фахрланамиз.

Ўйлайманки, бу одамлар уч томонлама ҳамкорликни, айниқса, глобал сиёсий муаммолар кўпайган бир пайтда умид манбаи сифатида қабул қилаётганидан далолатдир.

ЕХҲТ иқтисодий, экологик, гуманитар ва ҳарбий-сиёсий жиҳатларни қамраб олган хавфсизликка комплекс ёндашувга амал қилади. Айнан мана шу эътиборнинг кенглиги ЕХҲТга хос. Биз биргаликда нафақат Ўзбекистонда, балки бутун минтақада ишонч ва барқарорликни мустаҳкамлайдиган турли соҳаларда ишлаймиз.

Марказий Осиё бугунги кунда дунёнинг бошқа минтақаларидан ижобий томондан фарқ қилади. Бу эса ўзаро яқин мулоқот ва ҳамкорлик аниқ натижалар бераётганини кўрсатади.

Охир оқибат, буларнинг барчаси Ўзбекистон, Тожикистон ва Қирғизистон Президентларининг сиёсий иродаси боғлиқ бўлиб, улар ўз олдига катта мақсадларни қўйган.

Бизнинг мақсадимиз ушбу сиёсий қарашни аниқ ҳаракатларга айлантириш ва Марказий Осиёда сўнгги йилларда эришилган барқарорлик даражасини мустаҳкамлашга ёрдам беришдир.

Ўзбекистонни ва бутун минтақани ЕХҲТ мажбуриятлари ва қадриятларини бажаришда қўллаб-қувватлашдан манфаатдормиз. Ўзбекистон ҳамиша ишончли ҳамкор бўлиб келган ва унинг ушбу тамойилларни ҳаётга татбиқ этишда ишонч билан олға силжиб бораётганини кўришдан мамнунмиз.