КАТАЛЮД, 7 октябрь. /"Дунё" АА/. Ўзбекистон элчихонаси ташаббуси билан Испаниянинг Калатаюд шаҳрида "Viveros Verón" компанияси билан ҳамкорликда "Келажак мевалари: селекциядан брендгача" мавзусида бизнес-семинар ташкил этилди, деб хабар бермоқда "Дунё" АА мухбири.

Тадбирда Ўзбекистоннинг аграр соҳадаги салоҳияти тақдимоти ўтказилди. Семинар иштирокчилари республика аграр секторининг стратегик ривожланиши ҳамда Ўзбекистоннинг мева-сабзавот маҳсулотларини ишлаб чиқариш ва экспорт қилишдаги ноёб имкониятлари ҳақида маълумотга эга бўлдилар.

Қайд этилганидек, қишлоқ хўжалиги Ўзбекистон учун озиқ-овқат хавфсизлигининг пойдевори, миллионлаб фуқаролар бандлиги манбаи ва энг жадал экспорт секторларидан биридир. Ички эҳтиёжларни ҳам, экспортни ҳам таъминловчи барқарор ривожланиш драйверига айланган мева-сабзавот етиштиришга алоҳида эътибор қаратилмоқда.

Бугунги кунда Ўзбекистон қуритилган олхўри, ўрик, шафтоли, гилос, майиз, ёнғоқ ва дуккакли экинлар экспорти бўйича жаҳон етакчилари қаторига киради.

Тақдимотда Ўзбекистоннинг экспорт натижалари ҳақидаги маълумотлар ҳам тақдим этилди. Таъкидланганидек, бугунги кунда экспорт Туркия, Хитой, Россия, БАА, Германия, Буюк Британия, Япония ва Канадани ўз ичига олган 16 та янги мамлакатни қамраб олган бўлиб, 2025 йилнинг биринчи олти ойида озиқ-овқат экспорти 44 фоизга ошган.

Ўзбекистон салоҳиятининг тақдимоти қатнашчиларда катта қизиқиш уйғотди, бу эса мамлакатнинг халқаро мева-сабзавот бозоридаги стратегик иштирокчилардан бири сифатидаги ўсиб бораётган ролини тасдиқлади.

Семинар иштирокчилари Ўзбекистон билан ҳамкорликда катта истиқболларни кўраётганларини таъкидладилар.

Тадбирда турли мамлакатлардан 20 дан ортиқ компания вакиллари, жумладан, аграр ва озиқ-овқат секторининг етакчи ишбилармон доиралари вакиллари, шунингдек, Калатаюд шаҳри ҳокими Хосе Мануэл Аранда иштирок этди.