ТОШКЕНТ, 21 август. /"Дунё" АА/. Ҳукуматлар минтақа учун янги сулҳ таклифини кўриб чиқаётган бир пайтда, Исроил ҳарбийлари Ғазо шаҳрини эгаллаш бўйича қуруқликдаги операциянинг илк босқичи бошлаганини маълум қилди, деб хабар қилмоқда "Дунё" AA мухбири.

Исроил армияси расмий вакили Эффи Дефрин "BBC" телеканалига берган интервьюсида "Биз Ғазо ҳудудига қарши дастлабки операцияларни бошладик ва ЦАҲАЛ кучлари ҳозирда шаҳар четларини назорат қилмоқда", – дея таъкидлади

Брифингда иштирок этган ҳарбий мутасаддининг айтишича,  захира аскарлари сентябрга қадар хизматга чақирилмайди. Бу эса араб воситачиларига ҲАМАС ва Исроил ўртасидаги тинчлик шартларига оид келишмовчиликларни бартараф этиш учун имконият тақдим этади.

Аммо 20 август куни Исроил қўшинлари Фаластин анклавида ҲАМАС жангарилари билан тўқнаш келганидан сўнг, Бош вазир Беньямин Нетаньяху идораси Исроил раҳбари гуруҳ истеҳкомларини ўз назоратига олиш ва уни мағлуб этиш муддатларини тезлаштирганини айтди.

Исроилнинг баёнотлари, мамлакат Фаластиннинг энг йирик шаҳри Ғазони қўлга киритиш режасини амалга оширишда давом этаётганини кўрсатмоқда, халқаро танқидларга қарамай, кўпроқ фаластинликлар кўчириб юбориши мумкин.

ҲАМАС telegram ижтимоий тармоғида эълон қилган баёнотида Исроил раҳбарини "Ғазо шаҳридаги бегуноҳ тинч аҳолига қарши шафқатмиз урушни" тўхтатиш келишувига тўсқинлик қилганликда айблади.

Ҳозирги кунда Исроил Ғазо сектори ҳудудининг тахминан 75 фоизини назорат қилмоқда. Шу ойда Исроил ўзига тегишли ҳарбий операцияларни кенгайтиришни режалаштирган бўлиб, бугунги кунда мудофаа вазири Исраэль Кац Ғазо шаҳрини тўлиқ қўлга киритиш режасини тасдиқлади.

Эслатиб ўтамиз, ҲАМАС 60 кунлик тинчлик cулҳи таклифини араб воситачилари иштирокида қабул қилган эди. Исроил ҳукумати ҳали бу таклифни ўрганмоқда, бироқ барча қолган гумондорларнинг озод қилиниши талабини билдирмоқда.

Исроилнинг Ғазо секторидаги ҳарбий операциялари натижасида шу кунга қадар 62 мингдан ортиқ одам ҳалок бўлган, уларнинг катта қисми аёллар ва болаларни ташкил этади. 2023 йил октябрдан буён очарчилик оқибатида 269 киши ва май ойидан буён ёрдам олишга ҳаракат қилган 1760дан ортиқ одам вафот этган.

 "AFP" агентлиги олган сурат