ВАШИНГТОН-ТЕҲРОН, 21 июль. /“Дунё” АА/. АҚШ ҳарбийлари Эроннинг ҳарбий қўмондонлик марказлари, ракета ва дронлар учириш майдончалари, денгиздаги ҳарбий ҳамда ҳаво ҳужумидан мудофаа тизимларига навбатдаги зарбаларни берди, деб хабар бермоқда “Дунё” АА мухбири.

АҚШ Марказий қўмондонлиги (CENTCOM)нинг маълум қилишича, сўнгги ҳужумлар тахминан беш соат давом этган. Шу билан АҚШнинг Эронга қарши зарбалари кетма-кет ўнинчи тун ҳам давом этди.

Вашингтон расмийларига кўра, ушбу операциялардан кўзланган асосий мақсад Эроннинг Ҳўрмуз бўғози орқали ҳаракатланаётган тижорат кемаларига ҳужум қилиш имкониятларини заифлаштиришдан иборат бўлган. Шунингдек, дам олиш кунлари ҳалок бўлган америкалик ҳарбийлар сони 17 нафарга етгани қайд этилган.

Ўз навбатида, Эрон Американинг Кувайтдаги ҳарбий объектлари ва техникаларига – Ал-Адири лагери ҳамда Али Ал-Салом авиабазасига зарба берди. Шу билан бирга, Эрон Иорданиядаги АҚШ ҳарбий базасига ҳужумлар уюштирган. Ҳужум оқибатида бир қанча АҚШ ҳарбийлари ҳалок бўлган.

20 июль куни АҚШ Президенти Дональд Трамп америкалик ҳарбийлар ҳалок бўлганидан сўнг Эрондан қасос олишга ваъда берган. Сўнгги бир ҳафта давомида у Эронда нишонга олинаётган объектлар рўйхатини энергетика иншоотлари ва кўприклар ҳисобига кенгайтириш мумкинлигини бир неча бор таъкидлаган.

Пентагон маълумотларига кўра, уруш бошланганидан буён қарийб 430 нафар АҚШ ҳарбийси яраланган. Фақат жорий йилнинг 7 июлидан буён 100 нафар ҳарбий жароҳат олган бўлиб, уларнинг 96 фоизи хизматга қайтган.