ВАШИНГТОН, 23 август. /“Дунё” АА/. АҚШ Президенти Дональд Трамп, агар республикачилар 3 ноябрь куни бўлиб ўтадиган оралиқ сайловларда Конгресс устидан назоратни йўқотса, демократлар унга импичмент эълон қилиши мумкинлигини маълум қилди, деб хабар бермоқда “Дунё” АА мухбири.

“Улар менга импичмент эълон қилмоқчи. Нима учун бундай қилаётганини ўзлари ҳам билишмайди”, – деди Дональд Трамп Жанубий Каролинадаги тарафдорлари билан учрашувда.

Эслатиб ўтамиз, Дональд Трамп 2024 йил ноябрдаги сайловларда ғалаба қозониб, иккинчи муддатга Оқ уйга қайтган ва 2025 йил 20 январда ўз лавозимини бажаришга киришган эди. Унинг амалдаги ваколат муддати 2029 йил 20 январда якунланиши керак.

Бу баёнот маъмуриятнинг ташқи сиёсатдаги муаммолари фонида янгради. Эрон билан уруш боши берк кўчага кириб қолган, Украина ва Ғазо бўйича музокаралар самарасиз якунланмоқда, бензин нархининг ошиши ва инфляция эса президент рейтингига босим ўтказмоқда. “Reuters/Ipsos” сўровномасига кўра, америкаликларнинг 33 фоизи унинг фаолиятини маъқуллайди.

Агар республикачилар Конгресснинг бир ёки ҳар иккала палатаси устидан назоратни йўқотса, Дональд Трампга президентлик муддатининг сўнгги икки йилида ўз кун тартибини илгари суриш қийинлашади.

Шу билан бирга, амалдаги президент бир неча бор учинчи муддатга қолиш эҳтимолини тилга олган. АҚШ Конституциясига киритилган 22-тузатиш бир кишининг икки мартадан ортиқ президент этиб сайланишини тақиқлашига қарамай, сўнгги кунларда у бу имкониятни яна очиқ қолдирган.