ВАШИНГТОН–ТЕҲРОН, 21 август. /“Дунё” АА/. АҚШ Эронга қарши санкциялар пакетини тайёрламоқда ва молия вазири Скотт Бессентнинг фикрича, бу тарихда энг йириги санкция бўлади, деб хабар бермоқда “Дунё” АА мухбири “Reuters” агентлигига таяниб.

Америка томони янги чоралар тафсилотларини 24 август куни тақдим этиш ниятида. Вазирлик вакилининг сўзларига кўра, иқтисодий тазйиқнинг кучайтирилиши кенг кўламли ҳарбий амалиётларни қайта бошлаш заруратини камайтириши мумкин. У, шунингдек, Вашингтон Эрон ҳукуматига иқтисодий босим ўтказиш ва уни яккалаб қўйишга эришмоқчи эканини маълум қилди.

Бундан бир кун аввал АҚШ Президенти Дональд Трамп ҳам Эронга қарши мисли кўрилмаган иқтисодий уруш бўлишидан огоҳлантирган эди. У Теҳронга ҳар қандай кўмак кўрсатадиган мамлакатлар, молия институтлари, компаниялар ва давлат тузилмалари жиддий иқтисодий оқибатларга дуч келишини таъкидлади.

Эрон Американинг бу чораларини қоралаб, санкцияларни “иқтисодий терроризм” деб атади. Эрон парламенти спикери Муҳаммад Боқир Қолибоф Теҳрон санкциялар босимига қарши туришга тайёрланиши ва бошқа давлатлар билан иқтисодий алоқаларни мустаҳкамлаши лозимлигини айтди.

Эслатиб ўтамиз, аввалроқ АҚШ ва Эрон ўртасида эришилган келишув Ҳўрмуз бўғози орқали кемалар қатновини тиклашни, санкцияларни бекор қилиш ва Эрон активларини музлатишдан чиқариш бўйича музокаралар ўтказишни кўзда тутган эди. Бироқ, белгиланган муддат ўтиб кетди ва музокаралар жараёни амалда боши берк кўчага кириб қолди.

“Reuters” агентлиги сурати