ВАШИНГТОН–ТЕҲРОН, 28 сентябрь. /“Дунё” АА/. АҚШ Президенти Дональд Трамп Теҳроннинг Ҳўрмуз бўғози фаолиятини қайта тиклаш ва ҳарбий ҳаракатларни тўхтатиш таклифини рад этганидан сўнг, Эрон АҚШ ва Исроил билан можарони фақат дипломатик йўл билан ҳал қилиш мумкинлигини маълум қилди, деб хабар бермоқда “Дунё” АА мухбири “Reuters” агентлигига таяниб.

Эрон ташқи ишлар вазири Аббос Аракчи Теҳроннинг шартлари бажарилган тақдирдагина Ҳўрмуз бўғозини очиш мумкинлигини айтди. Унинг сўзларига кўра, Эрон ва АҚШ ўртасидаги алоқаларда иштирок этаётган воситачилар ҳозирча Вашингтон позициясини Теҳронга расман етказмаган.

Аввалроқ Эрон Нью-Йоркдаги БМТ Бош Ассамблеясида можарони тўхтатиш таклифини тақдим этган ва уни Қатардаги воситачилар орқали Америка томонига етказган эди. Президент Дональд Трамп бу режани рад этганини айтди, бироқ кейинчалик америкалик музокарачилар шу ҳафта Теҳрон билан алоқаларни давом эттириш ниятида эканини маълум қилди.

АҚШнинг БМТдаги доимий вакили Майк Уолтцнинг сўзларига кўра, Вашингтон бу таклифга рози бўлмаган, чунки Теҳрон кейинги музокаралар бошланишидан олдин санкцияларни зудлик билан бекор қилиш ва активларни музлатишдан чиқаришни талаб қилган. Эрон Президенти Масъуд Пезешкиён мамлакат ядро дастури ва бошқа масалаларни муҳокама қилишга тайёрлигини, бироқ босим ёки таҳдидларга рози бўлмаслигини айтди.

28 февраль куни АҚШ ва Исроилнинг Эронга берган зарбаларидан сўнг бошланган можаро Ҳўрмуз бўғози орқали кема қатновида катта узилишларга олиб келди ҳамда жаҳон нефть етказиб бериш тармоғи ва иқтисодиётига салбий таъсир кўрсатди. Эрон кучлари минтақадаги Америка иттифоқчиларига ҳам зарба берган.

Айни пайтда Саудия Арабистони можарога тобора кўпроқ жалб қилинмоқда. Яман ҳусийлари бир неча бор мамлакат ҳудудига зарбалар берган ва уларнинг Ямандаги силжишлари Саудия Арабистонининг Қизил денгиз орқали нефть экспортига таҳдид солмоқда.

Кескинлик фонида Саудия Арабистони ҳукумати Ар-Риёддаги баъзи мактабларда дарслар масофавий форматга ўтказилгани ҳақида маълум қилди. Яманда ҳам Таиз вилоятидаги бозорга берилган зарба оқибатида тинч аҳоли ҳалок бўлгани ва яралангани ҳақида хабар берилган.

 “Arab News” сурати