БАҒДОД, 28 сентябрь. /“Дунё” АА/. Бағдод АҚШ қўшинлари Ироқ ҳудудидан тўлиқ олиб чиқилганини маълум қилди, деб хабар бермоқда “Дунё” АА мухбири “DW News”га таяниб.

Ироқ ҳукумати маълумотларига кўра, АҚШнинг барча жанговар бўлинмалари ва логистик қўллаб-қувватлаш кучлари мамлакатни тарк этган. Хабар эълон қилинган вақтда Вашингтон бу маълумотни расман тасдиқламаган эди.

Америка қўшинларини олиб чиқиш бўйича АҚШ ва Ироқ 2024 йилда келишиб олган эди. Сўнгги йилларда мамлакатда 2,5 мингга яқин америкалик ҳарбий хизматчи бўлган.

АҚШнинг сўнгги бўлинмалари Эрбилда, Бағдод аэропорти яқинидаги ҳарбий база ва пойтахтнинг “яшил зонаси” – ҳукумат даҳасида жойлашган эди.

2014 йилдан бери АҚШ ва унинг иттифоқчилари Ироқ ва Сурияда “Ислом давлати” террорчилик ташкилотига қарши операциялар ўтказиб келган. Гуруҳнинг асосий кучлари тор-мор қилинган бўлса-да, унинг айрим ячейкалари минтақада ҳаракат қилишда давом этмоқда.

Америка қўшинларининг олиб чиқилиши фонида 28 сентябрь куни Ироқда “Мустақиллик куни” деб аталадиган тадбирлар ўтказилмоқда. Давлат идоралари шу куни ёпиқ бўлади.

Эрон билан боғлиқ қуролли гуруҳларнинг келгусида мамлакатда қолиши масаласи ҳам долзарблигича қолмоқда. Уларни қуролсизлантириш ва давлат куч тузилмаларига интеграция қилиш Америка қўшинлари кетганидан кейин амалга оширилиши режалаштирилган эди.

Бироқ Ироқнинг янги бош вазири Али аз-Зайдий бу чоралар 2027 йилнинг июнигача кечиктирилишини қайд этди.

Эслатиб ўтамиз, шу йил июль ойида АҚШ президенти Дональд Трамп Оқ уйда Ироқнинг янги бош вазирини қабул қилиш чоғида Америка қўшинлари 30 сентябргача Ироқни тўлиқ тарк этишини таъкидлаганди.

“AFP” агентлиги сурати