БРЮССЕЛЬ, 28 сентябрь. /“Дунё” АА/. Ўзбекистон бизнес-делегацияси Бельгия ва Люксембургга ташриф буюриб, Европа компаниялари билан музокаралар ўтказди ҳамда қатор амалий келишувларга эришди, деб хабар бермоқда “Дунё” АА мухбири.

Ташриф давомида маҳаллий ва Европа бизнеси вакиллари билан B2B форматидаги учрашувлар бўлиб ўтди. Томонлар инвестициялар, транспорт боғлиқлиги, Европа Иттифоқи бозорларига чиқиш, молиявий ҳамкорлик ва рақамли хизматларни ривожлантириш масалаларини муҳокама қилди.

Ўзбекистоннинг Бельгиядаги элчихонасида Европа комиссияси ва Европа инвестиция банки вакиллари иштирокида учрашув бўлиб ўтди. Инвестициявий ҳамкорлик, “Global Gateway” ташаббуси, транспорт инфратузилмаси ва хусусий сектор билан ўзаро ҳамкорлик учрашувнинг асосий мавзулари бўлди.

Музокаралар якунлари бўйича томонлар савдо-иқтисодий ҳамкорликни кенгайтириш, логистика алоқаларини ривожлантириш, Ўзбекистон маҳсулотларини Бельгия бозорига етказиб бериш, фармацевтика соҳасида технологик ва инвестициявий ҳамкорлик бўйича келишувларга эришди.