ПЕКИН, 5 июнь. /“Дунё” АА/. Хитой Бирлашган Миллатлар Ташкилотининг навбатдаги бош котибини сайлаш жараёнида фаол иштирок этиш ва жаҳон ташкилотининг ролини мустаҳкамлаш борасидаги саъй-ҳаракатларни қўллаб-қувватлаш ниятида эканини эълон қилди, деб хабар беради “Дунё” АА мухбири “Синьхуа” ахборот агентлиги маълумотига таяниб.

Бу ҳақда ХХР Ташқи ишлар вазири Ван И БМТ раҳбари лавозимига эҳтимолий номзодлар қаторида кўрилаётган Чили собиқ президенти Мишель Бачелет билан учрашувда айтиб ўтди.

Дипломатнинг сўзларига кўра, Пекин бош котиб лавозимига номзодларни кўриб чиқишда масъулиятли ва конструктив ёндашади. Мамлакат БМТ самарадорлигини ошириш, унинг нуфузини юксалтириш ва замонавий халқаро чақириқларга жавоб бериш қобилиятини мустаҳкамлашга кўмаклашиш ниятида.

ТИВ раҳбари БМТ ўзгарувчан глобал вазиятга мослашиши ҳамда хавфсизлик, тараққиёт ва халқаро ҳамкорлик билан боғлиқ глобал муаммоларни ҳал қилишда етакчи ўринни сақлаб қолиши кераклигини таъкидлади.

Мишель Бачелет учрашувда БМТ глобал чақириқлар шароитида давлатларнинг ўзаро ҳамкорлиги учун ўрни беқиёс платформа бўлиб қолаётганини қайд этиб, ташкилот ўз Низомига таяниши ва учта асосий йўналиш – тинчликни сақлаш, тараққиёт ва инсон ҳуқуқларини ҳимоя қилишга устувор эътибор қаратиши лозимлигини айтди.

Чилининг собиқ президенти, шунингдек, Хитой ва бошқа давлатлар билан ҳамкорлик қилишга тайёрлигини билдирди ҳамда Пекиннинг кўп томонлама ҳамкорликни ривожлантириш ва БМТ фаолиятини қўллаб-қувватлашга қўшаётган ҳиссасини юқори баҳолади.

Эслатиб ўтамиз, БМТнинг янги бош котибини сайлаш жараёни 2025 йил охирида бошланган эди. Ташкилотнинг амалдаги раҳбари Антониу Гутерришнинг ваколатлари шу йилнинг 31 декабрида ниҳоясига етади. Бош котиб Хавфсизлик Кенгашининг тавсиясига кўра тайинланади ва БМТ Бош Ассамблеяси томонидан тасдиқланади. Ваколат муддати қайта сайланиш имконияти билан беш йилни ташкил этади. Анъанага кўра, номзод Хавфсизлик Кенгашининг бешта доимий аъзоси – Россия, Буюк Британия, Хитой, АҚШ ёки Франциядан бўлиши мумкин эмас.