ВАШИНГТОН, 14 август. /“Дунё” АА/. Кэролайн Левитт лавозимини тарк этгач, Оқ уй матбуот котиби ўрнига бир нечта номзод кўриб чиқилмоқда, деб хабар беради “Дунё” АА мухбири “Politico” порталига таяниб.

Бу лавозимга энг эҳтимолий даъвогарлар қаторида АҚШ протокол раҳбари, элчи Моника Кроули, “CNN” телеканали шарҳловчиси Скотт Женнингс ва Дональд Трамп штаби собиқ вакили Жейсон Миллер бор.

Портал хабарига кўра, Кэролайн Левиттнинг эҳтимолий ўринбосарлари сифатида Дональд Трампнинг собиқ маслаҳатчиси Алина Хабба ва Оқ уй матбуот котиби ўринбосари Анна Келли ҳам тилга олинмоқда. Айни пайтда яққол фаворит йўқ.

28 ёшли Кэролайн Левиттнинг ўз лавозимини тарк этиш нияти бир кун аввал маълум бўлди. У оиласи билан кўпроқ вақт ўтказиш истагини сабаб қилиб, ой охирида ишдан кетишга қарор қилган. Кэролайн Левитт Оқ уй тарихидаги энг ёш матбуот котибига айланди.

Президент Дональд Трамп уни ўзининг энг ишончли ёрдамчиларидан бири деб атади. Оқ уйнинг коммуникациялар бўйича директори Стивен Чунг “CNN” телеканалига берган интервьюсида Кэролайн Левиттнинг ягона эканини ва ҳеч ким унинг ишини тўлиқ такрорлай олмаслигини айтди.

Қайд этилишича, унинг ўрнига муносиб номзод топиш амалдаги маъмурият учун қийин вазифа бўлиши мумкин. У нафақат журналистлар учун мунтазам брифинглар ўтказган, балки Оқ уйнинг оммавий позициясини шакллантиришда қатнашиб, президентга медиа масалалари бўйича маслаҳатлар ҳам берган.

“Politico” нашри Дональд Трамп Кэролайн Левиттнинг вориси бўйича ҳали бир қарорга келмаганини таъкидлаган. Лавозим бир мунча вақт, жумладан, ноябрда бўлиб ўтадиган Конгрессга оралиқ сайловларгача бўш қолиши истисно этилмаяпти.

“The New York Times” сурати