ВАШИНГТОН, 13 август. /“Дунё” АА/. “The Intercept” нашри ва “Freedom of the Press Foundation” жамғармаси АҚШ Президенти Дональд Трампга қарши федерал даъво аризаси киритиб, унинг “Truth Social” ижтимоий тармоғидаги нашрларига пулли кириш имкониятини бекор қилишни талаб қилмоқда, деб хабар беради “Дунё” АА мухбири.

“Reuters” агентлигининг хабар беришича, даъво “Trump Media & Technology Group” компанияси томонидан 1 август куни ишга туширилган “Truth API” хизматига тааллуқли. Ушбу хизмат обуначиларга ойига 60–100 минг доллар эвазига “Truth Social”даги 10 та машҳур аккаунт, жумладан, президент аккаунти постлари билан муддатидан аввал танишиш имконини беради.

Даъвогарларнинг таъкидлашича, хизмат пулли фойдаланувчиларга молия бозорларига таъсир кўрсатиши мумкин бўлган маълумотларни бошқалардан олдин олишга шароит яратади. Дональд Трамп “Truth Social”дан акциялар, нефть ва бошқа активлар нархига таъсир қилиши мумкин бўлган тарифлар, ташқи сиёсат ва Яқин Шарқдаги можаролар ҳақида хабар бериш учун мунтазам фойдаланади.

Даъво аризасида айтилишича, президент ўзининг давлат фаолияти билан боғлиқ ахборотга кириш ҳуқуқини сотишдан молиявий манфаат кўрмоқда. Даъвогарлар буни АҚШ Конституциясининг Биринчи тузатишига зид деб ҳисоблаб, пулли хизмат амалда экан, Оқ уйнинг расмий хабарларни фақат “Truth Social” орқали эълон қилишини тақиқлашни талаб қилмоқда.

Таъкидланишича, 10 дан ортиқ мижоз аллақачон “Truth API”га обуна бўлган. Хизмат Дональд Трампнинг аккаунтидан ташқари, вице-президент Жей Ди Венс, Соғлиқни сақлаш ва ижтимоий хизматлар вазири кичик Роберт Кеннеди, ФҚБ директори Кеш Патель ҳамда Оқ уйнинг нашрлари билан танишиш имконини ҳам таклиф этади.

Дональд Трамп “Trump Media & Technology Group”нинг энг йирик акциядори бўлиб, “Donald J. Trump Revocable Trust” орқали компаниянинг 41,3 фоизига эгалик қилади. Унинг тўнғич ўғли кичик Дональд Трамп “Trump Media” директорлар кенгаши аъзоси бўлиб, ушбу трастни бошқаради.

“Trump Media”да Президент Дональд Трампнинг хабарлари аллақачон кўплаб платформалар ва оммавий ахборот воситалари, жумладан, пулли обуна хизматлари орқали тарқатилаётганини маълум қилди. Оқ уй ҳозирча даъво юзасидан изоҳ бермади.

“Reuters” агентлиги сурати