АСУНСЬОН, 6 ноябрь. /“Дунё” АА/. Парагвай Президенти Сантьяго Пенья “Ueno” маҳаллий банкининг қулаши ортидан келиб чиққан инқироз ва оммавий норозиликлар фонида давлат раҳбарлиги лавозимидан кетишини эълон қилди, деб хабар бермоқда “Дунё” АА мухбири “BBC”га таяниб.

Банк ўз фаолиятини тўхтатиб, мамлакат Марказий банки бошқарувига ўтди. Натижада уч миллионга яқин мижоз ўз жамғармаларидан фойдаланиш имкониятидан маҳрум бўлди ва бу президентнинг истеъфосини талаб қилган норозилик намойишларини келтириб чиқарди.

Сантьяго Пенья 2025 йилгача банкка эгалик қилган гуруҳ акциядорлари қаторида бўлгани ҳақидаги хабарлардан сўнг норозилик янада кучайди. У манфаатлар тўқнашуви ва молиявий ташкилотнинг қулаши ҳақидаги маълумотларни яширганликда айбланди.

“Агар қайсидир пайтда кутган умидларингизни оқлай олмаган бўлсам, халқимиздан узр сўрайман. Сиз менга билдирган ишончга ҳеч қачон хиёнат қилиш ниятида бўлмаганман”, – деди президент.

У ўз қарорини ноқонуний хатти-ҳаракатлар ҳақидаги айбловларни рад этган ҳолда, барқарорлик ва демократик институтларни сақлаб қолиш зарурлиги билан изоҳлади.

Бир кун олдин Конгресс қуйи палатаси импичмент жараёнини бошлаш учун овоз берган эди. Президентни лавозимидан четлаштириш қарорини ўзининг партияси депутатлари ҳам қўллаб-қувватлади. Давлат раҳбари лавозимини эндиликда вице-президент Педро Аллиана эгаллаши керак.

Эслатиб ўтамиз, Сантьяго Пенья 2023 йилда президент этиб сайланган эди. У 2025 йил 11–13 декабрь кунлари расмий ташриф билан Ўзбекистонда бўлиб, пойтахтнинг қатор диққатга сазовор объектларига ташриф буюрган эди.

“AFP” агентлиги сурати