ВАШИНГТОН–ГАВАНА, 16 июль. /“Дунё” АА/. Пентагон Кубага қарши эҳтимолий ҳарбий ҳаракатларнинг бир нечта сценарийсини, жумладан, десант туширишни кўриб чиқмоқда, бироқ бу масала бўйича якуний қарор ҳали қабул қилинмаган, дея хабар бермоқда “Дунё” АА мухбири “CBS News”га таяниб.

Телеканалнинг Оқ уйдаги манбасига кўра, турли вариантлар муҳокамаси бир неча ҳафтадан буён давом этмоқда. Шу билан бирга, суҳбатдошлар яқин келажакда ҳарбий амалиёт ўтказилиши эҳтимоли камлиги, чунки Пентагон ресурсларининг катта қисми Эрон билан зиддиятга жалб қилинганини таъкидламоқда.

Аввалроқ, АҚШ Мудофаа вазири Пит Хегсет Кубага нисбатан куч ишлатиш сценарийсини истисно қилмаган эди. Унинг сўзларига кўра, Гавананинг Америка ҳудудига таҳдид солиши мумкин бўлган қуролларни сотиб олиши эҳтимоли қарама-қаршилик учун асос бўлади.

Америка разведкаси маълумотларига кўра, Куба Гуантанамодаги АҚШ базаси, Ҳарбий денгиз кучлари кемалари ва Флоридадаги ҳарбий объектларга зарба бериш учун қўлланиши мумкинлиги айтилаётган 300 дан ортиқ учувчисиз учоқ (дрон) сотиб олган.

Айни вақтда Вашингтон Куба ҳукуматига сиёсий ва иқтисодий босимни кучайтиришда давом этмоқда. Давлат котиби Марко Рубио АҚШ мамлакатда сиёсий ўзгаришлар бўлишидан ҳамон умидвор эканини, бироқ Куба раҳбариятини ислоҳотлардан воз кечишда ва давлат устидан тўлиқ назоратни сақлаб қолишда айблашини маълум қилди.

Кубанинг ўзида вазият кескинлигича қолмоқда. Сўнгги кунларда мамлакатнинг бир қатор ҳудудларида миллий энергетика тизимининг оғир аҳволи ва ёқилғи танқислиги сабабли электр энергияси яна тўлиқ ўчирилди. Аҳоли бир неча соатлаб давом этадиган мунтазам электр узилишларига дуч келмоқда.

Куба Президенти Мигель Диас-Канель аввалроқ мамлакат эҳтимолий тажовузни қайтаришга тайёрлигини айтган эди. “Биз курашамиз, ўзимизни ҳимоя қиламиз ва агар жангда ҳалок бўлиш тақдиримизда бўлса, Ватан учун ўлиш – яшаш демакдир”, – дея таъкидлади у.

Шу билан бирга, “The Wall Street Journal” нашри АҚШ маъмурияти Кубада ҳокимият алмашинувини 2026 йил охиригача ўзининг ташқи сиёсий мақсадларидан бири сифатида кўраётгани ҳақида хабар берди. Илгари бундай сценарий Венесуэлада амалга оширилган, ўшанда собиқ президент Николас Мадуро америкалик ҳарбийлар томонидан ўғирлаб кетилган эди.