НЕЙПЬИДО, 16 июль. /“Дунё” АА/. Мьянмадаги зўравонликлардан қочиб, денгизда ғойиб бўлган иккита қайиқдаги 500 нафардан зиёд киши ҳалок бўлган бўлиши мумкин, деб тахмин қилинмоқда, деб хабар бермоқда “Дунё” АА мухбири Халқаро миграция ташкилоти ва БМТнинг Қочоқлар ишлари бўйича олий комиссари бошқармасининг қўшма баёнотига таяниб.

Манбаларда ёзилишича, кемалар июнь ойи охирида Мьянманинг ғарбидаги Ракхайн штатидан йўлга чиққан. Битта қайиқда 250 нафарга яқин киши бўлган, бироқ йўлга чиққанидан кўп ўтмай у билан алоқа узилган. Тахминан 280 йўловчиси бўлган иккинчи кема эса 8 июль куни Айярвади штати қирғоқлари яқинида чўкиб кетган.

Йўловчиларнинг аксарияти кўплаб йиллар давомида таъқиб ва зўравонликка учраб келаётган Мьянмадаги мусулмон этник озчилиги – роҳинжа халқи вакиллари эди. 1 миллиондан ортиқ роҳинжа аввалроқ Бангладешга қочиб ўтган бўлиб, у ерда уларнинг кўпчилиги аҳоли зич жойлашган қочқинлар лагерларида яшамоқда.

БМТ маълумотларига кўра, хавфли денгиз йўллари кўплаб қочқинлар учун можаро ҳудудларини тарк этишнинг кам сонли имкониятларидан бири бўлиб қолмоқда. Мьянмада давом этаётган фуқаролар уруши, ҳарбий ҳокимият ва “Аракан армияси” қуролли гуруҳи ўртасидаги қарама-қаршиликнинг кучайиши, шунингдек, мураккаб об-ҳаво шароити вазиятни янада оғирлаштирмоқда.

Халқаро миграция ташкилоти ва БМТнинг Қочоқлар ишлари бўйича олий комиссари бошқармаси қурбонлар ҳақидаги хабарлар ҳали расман тасдиқланмаганини маълум қилди. Бироқ ташкилотлар фожианинг эҳтимолий кўламидан жиддий хавотир билдирди. Йил бошидан бери Андаман денгизи ва Бенгалия кўрфазида 300 нафарга яқин одам ҳалок бўлган ёки бедарак йўқолган.

Халқаро ташкилотлар қидирув-қутқарув ишларини кучайтиришга, қочқинлар учун ҳимоядан фойдаланиш имкониятини таъминлашга ҳамда контрабанда ва одам савдоси тармоқларига қарши чоралар кўришга чақирди.