БРЮССЕЛЬ, 14 декабрь. /"Дунё" АА/. Брюсселдаги Европа парламенти биносида Ўзбекистон ва Европа Иттифоқи ўртасида дипломатик муносабатлар ўрнатилганининг 30 йиллигига бағишланган "Ўзбекистон – тарих ва замонавийликнинг ноёб симфонияси" фотокўргазмаси очилди, деб хабар қилмоқда "Дунё" АА мухбири.

Кўргазманинг очилиш маросимида Ўзбекистон Олий Мажлиси Сенати Раисининг биринчи ўринбосари Содиқ Сафоев бошчилигидаги мамлакатимиз делегация иштирок этди.

Ўзбекистоннинг маданий-тарихий мероси ва замонавий тараққиётини акс эттирувчи кўргазма Европарламентнинг Марказий Осиё давлатлари билан алоқалар бўйича делегацияси билан ҳамкорликда ташкил этилди.

Тадбирда Европа парламенти депутатлари, Европа комиссияси ва Европа ташқи ҳаракатлар хизмати вакиллари, дипломатик корпус вакиллари, эксперт ва таҳлилчилар, илмий доиралар ва оммавий ахборот воситалари вакиллари иштирок этди.

Парламентнинг Марказий Осиё мамлакатлари билан алоқалар бўйича делегацияси раиси, Европарламентнинг Италиядан келган депутати Жузи Принси ўз нутқида, ЕП Ўзбекистонга бағишланган фотокўргазманинг очилиши маданият, таълим ва инсонпарварлик каби умумий қадриятларга содиқликдан далолат эканини таъкидлади. "Биз биргаликда Марказий Осиё ва Европа ўртасида ўзаро тушунишни яхшилаш, халқлар ва мамлакатлар ўртасидаги ишончни мустаҳкамлаш, уларнинг дўстона маданий алоқалари ва барча соҳаларда самарали ҳамкорликни ривожлантиришга ёрдам берадиган кўприк қура оламиз", деди у.

Жузи Принси, шунингдек, Ўзбекистон ва ЕИ ўртасида дипломатик муносабатлар ўрнатилганининг 30 йиллиги билан табриклаб, Ўзбекистон ва Европа парламентарийларига парламентлараро мулоқот ҳамда ҳамкорликни мустаҳкамлашга қаратаётган доимий эътибори учун миннатдорлик билдирди.